Пратеникот на Левица, Димитар Апасиев, денеска во Основното јавно обвинителство даваше исказ по трите кривични пријави против него за ширење расна, верска и етничка нетрпеливост, односно за фејсбук-статусите што ги објави непосредно по парламентарните избори.
Како што рече Апасиев по давањето на исказот, пријавите против него се поднесени од Мерсиха Смаиловиќ, Тања Милевска и Хелсиншкиот комитет за човекови права, но и едно известување за сторено кривично дело од страна на МВР, кое, според него, се однесува на два фејсбук-статуса и една твитер-објава.
„Симптоматично е што поканата ми беше доставена преку полиција, наместо преку нормални канали на комуникација. Ова го сфаќам како форма на политички притисок врз мене бидејќи сега Левица станува фактор на политичката сцена“,
рече Апасиев.
Тој најави дека наредната недела ќе поднесе контрапријави против пријавителите за загрозување на сигурноста бидејќи во коментарите на неговите фејсбук-статуси имало закани по неговиот и по животот на неговото семејство.
„Очекуваме дека Обвинителството ажурно ќе постапи вака како што постапува за мене и во случаите кога во наредната недела јас ќе поднесам кривични пријави за загрозување на сигурноста бидејќи во тие статуси, особено кај една од пријавителките, има закани по мојот живот и по животот на моето семејство. Очекувам Обвинителството да биде вака ефективно и за оние што вечерта пукаа со калашникови и како оние што на секој втор збор се закануваат со војна, особено од албанскиот политички националистички кампус“,
рече Апасиев.
Додаде дека очекува кривичните пријави против него да бидат отфрлени, а во спротивно е подготвен правдата да ја бара и во Стразбур. Апасиев вели дека знае кога се надминати правните мерки во изразувањето, затоа, дури и по цена да биде „влечен по судови“, тој ќе го продолжел својот стил на изразување.
„Во ниту еден од моите фејсбук-статуси не постои надминување на прагот на толеранција, согласно судската пракса на Европскиот суд за човекови права. Согласно таа судска пракса, во едно демократско општество, се дозволени говори кои не само што ќе скандализираат, не морам јас на сите да им се бендисувам, јас тоа го знам, така што нема да престанам“,
рече Апасиев.
*Поврзана вест: