Антикорупциската комисија ја запре постапката за спроведените избори за нов ректор на Универзитетот „Кирил и Методиј“ (УКИМ) во Скопје, одлучија антикорупционерите на денешната седница.
Предметот се однесува на тоа дали е прекршен Изборниот законик со тоа што изборот за ректор се спроведуваа во период кога беа распишани парламентарните избори. Комисијата го отворила предметот по сопствена иницијатива пред пет дена, а причината за запирање на постапувањето е што не можеле да го известат Ректоратот дека е оформен предмет и да побараат изјаснување и оттаму.
„Иако во определениот рок беше изготвено писмено известување и се направи обид да се достави до Ректоратот и до ректорот, ние не успеавме да го доставиме. Беше отидено на лице место, но Ректоратот беше затворен со образложение дека не работат заради условите создадени со коронавирусот. Со необезбедувањето на уредна достава не можеме да го обезбедиме еден од основните елементи на ова постапување, а тоа е контрадикторноста на постапката“,
рекоа од Антикорупциска по што членовите гласаа да се запре постапувањето.
Запирањето појаснуваат е поради ограничените рокови утврдени и тоа ќе продолжи како редовна постапка.
Гласањето на УКИМ беше спроведено на 26 јуни, а досегашниот ректор Никола Јанкуловски беше реизбран за уште еден четиригодишен мандат. Тој е редовен професор на Медицинскиот факултет во Скопје и беше меѓу седумте кандидати.
Изборот на ректор го следеа низа контроверзии, а се започна со одлуката на Јанкуловски да распише избори, по што Независниот академски синдикат (НакС) посочи дека се брзаат и форсираат изборите, иако мандатот на новиот ректор треба да започне на 15 септември. Професорите членови на НакС реагираа дека постапката за избор не треба да биде започната во вонредна состојба кога имаше уредба дека мандатите на телата се продолжуваат, како и во период кога се распишани парламентарни избори. Но за оваа уредба, Уставниот суд се изјасни дека е мешање во автономноста на Универзитетот. На изборите реагираа и тројца од кандидатите кои ги ставија во мирување своите кандидатури и го обвинија ректорот дека насилно спроведуваат избори со Универзитетската изборна комисија.