Во првиот квартал од 2023 година извозот од индустриските зони достигнал 951,6 милиони евра, што е највисоко ниво досега во последниве пет години. Анализата на ТИРЗ покажува дека тоа е пораст од речиси 12 проценти во однос на истиот период лани и над 22 отсто во однос на 2021 година.
Во однос на првиот квартал од 2020 г., пак, извозната активност на компаниите е зголемена за 59 отсто, а на месечно ниво, вкупниот извоз од зоните во март достигнал 345 милиони евра, што претставува пораст за 31 отсто споредено со март минатата година.
“И во однос на увозот е регистрирано највисоко ниво досега во однос на споредбата по квартали во изминативе пет години. Така увозот во првиот квартал од годинава достигна 770 милиони евра и е за 3,5 проценти повисок од првиот квартал лани, и речиси 5 отсто повисок споредено со првиот квартал во 2021 година. Дури 40 проценти е порастот на увозот во однос на 2020, додека споредно со првиот квартал од 2019 година, увозот пораснал за 21 отсто, односно 57 проценти во однос на 2018. Во зоните во март месечниот увоз во ТИРЗ е на ниво од 279 милиони, што е за 17 отсто повеќе во однос на март лани. Анализата покажува дека во третиот месец од годинава е регистрирано и високо ниво на нето-извозот од 23,4 проценти“,
се вели во анализата на ТИРЗ.
Според податоците, се бележи и тренд на раст на бројот на вработени, кој во март достигнал највисоко ниво досега. Во компаниите во ТИРЗ-зоните, се вработени 16 650 лица, што претставува зголемување за речиси 15 отсто во однос на истиот период лани. Во првите три месеци во годината, во компаниите во ТИРЗ се вработени 260 нови лица.
„Се очекува трендот на раст да продолжи, со оглед на тоа што ТИРЗ во последниве две години се постигнати договори во вкупен обем од над 620 милиони евра и истите треба да донесат над 5000 нови работни места“,
информираат од ТИРЗ.