Вчера во Собранието беше повлечен предлогот Љубомир Јовески – доскорешниот државен јавен обвинител кој во декември лани замина во пензија – да биде предложен за уставен судија
Професорката на Правниот факултет „Јустинијан Први“ Скопје, Ана Павловска-Данева, е новиот предлог на СДСМ за уставен судија. Предлогот за нејзин избор е на дневен ред на денешната седница на Комисијата за избори и именувања. Павловска-Данева е и поранешна пратеничка на СДСМ.
Вчера во Собранието беше повлечен предлогот Љубомир Јовески – доскорешниот државен јавен обвинител кој во декември лани замина во пензија – да биде предложен за уставен судија. Тој во изјава за МИА рече дека е изненаден од повлекувањето на предлогот без да се наведат основните причини за тоа, како и дека е изненаден што претседателката на надлежната собраниска комисија само соопштила дека предлогот е повлечен без да каже повеќе детали.
„Изненадувачки, вулгарно беше тоа дека предлогот е повлечен без да се наведат основни причини за тоа. Пристојно е да се дадат два-три збора. Нанесена ми е штета. Ако не сметале дека може процесот да го водат до крај, не требало да ме предлагаат бидејќи бев изложен на непотребни напади“,
изјави поранешниот државен јавен обвинител.