Согласно Анекс 13 на Меѓународната организација за цивилно воздухопловство (ИЦАО), КИНСИВ претходно достави барање истрагата да биде делегирана на американскиот НТСБ
Според претседателот на КИНСИВ, Марјан Прпоски, во истрагата предводена од НТСБ ќе учествуваат и претставници на КИНСИВ
Националниот одбор за безбедност во транспортот (НТСБ) на Соединетите Американски Држави (САД) ќе ја преземе истрагата за инцидентот со авионот на „Рајанер“ од Солун кон Меминген што се случи во воздушниот простор над С Македонија, информираат од Комитетот за истраги и воздухопловни несреќи и сериозни инциденти (КИНСИВ), пренесува МИА.
Според информациите оттаму, согласно Анекс 13 на Меѓународната организација за цивилно воздухопловство (ИЦАО), КИНСИВ претходно достави барање истрагата да биде делегирана на американскиот НТСБ.
„Во истрагата предводена од НТСБ ќе учествуваат и претставници на КИНСИВ“,
изјави за МИА претседателот на Комитетот, Марјан Прпоски.
Посочи дека по добиената информација вчера во 13:20 часот дека се случил сериозниот инцидент во воздушниот простор на земјава, КИНСИВ ги извести надлежните тела согласно воздухопловните прописи, меѓу кои Француското биро за истраги и анализи за безбедноста на цивилното воздухопловство (БЕА), Грчката агенција за истраги на несреќи и сериозни инциденти, Националниот одбор за безбедност во транспортот (НТСБ) на САД и Меѓународната организација за цивилно воздухопловство (ИЦАО).
Авиокомпанијата „Рајанер“ соопшти дека нејзин авион што летал од Солун кон Меминген се вратил на аеродромот во Солун кратко по полетувањето, откако за време на летот се откачил прозорец до патник, додавајќи дека во инцидентот еден патник се здобил со полесни повреди.
Од компанијата информираат и дека авионот безбедно слетал во Солун, а патниците биле префрлени во терминалната зграда.
„Еден патник побара и доби медицинска помош по слетувањето во Солун. За да се намали доцнењето, беше обезбеден заменски авион со кој патниците продолжија кон Меминген, кој полета утрово во 9:35 часот по локално време“,
се вели во соопштението од авиокомпанијата.
Претходно денеска, Прпоски изјави дека итрагата за инцидентот со авионот на „Рајанер“ е во тек, додавајќи дека се во постојана комуникација со Националниот одбор за безбедност во сообраќајот (НТБС) на САД и дека за сите дополнителни информации во врска со случајот навремено ќе ја информираат јавноста.
Американскиот Национален одбор за безбедност во сообраќајот на Икс напиша дека ќе назначат акредитиран претставник кој ќе ѝ помогне на Република Северна Македонија во истрагата за несреќата на летот на „Рајанер“.
„Согласно меѓународните протоколи на Меѓународната организација за цивилна авијација (ИКАО), Анекс 13, сите информации за истрагата ќе бидат обезбедени од страна на Република Северна Македонија“,
напишаа од НТСБ на Икс.
Што се случило во авионот на „Рајанер“ сè уште не е целосно разјаснето, а во јавноста се појавија најмалку две верзии за инцидентот.
Грчкиот весник „Катимерини“, повикувајќи се на извори од аеродромот во Солун, објави дека авионот кој летал на релација Солун-Меминген се соочил со проблем додека се наоѓал во воздушниот простор над Северна Македонија, по што се вратил на аеродромот во Солун.
Според овие информации, при слетувањето се откачил дел од моторот, кој повредил еден од патниците.
Од друга страна, авиокомпанијата „Рајанер“ во своето соопштение наведува дека за време на летот се откачил прозорец покрај еден од патниците, по што авионот се вратил во Солун.
Фотографии и видеа објавени на социјалните мрежи покажуваат оштетувања на авионот. Според сведоштва на патници објавени во дел од медиумите, при откачувањето на прозорецот дошло до нагла декомпресија, а патникот кој седел најблиску до прозорецот, државјанин на Србија, бил изложен на опасност да излета од авионот.
Според изјавите неговата сопруга, тој бил задржан во авионот благодарение на безбедносниот појас, како и со нејзина помош и на двајца други патници, кои го држеле. По слетувањето во Солун, тој е пренесен во болница.