Американската агенција за храна и лекови (ФДА) го одобри итниот третман со лекот за ковид-19 кој во експерименталната фаза му беше даден на американскиот претседател Доналд Трамп, кога тој беше позитивен на вирусот, а за кој рече дека му помогнал да оздрави.
Станува збор за третман со антитела кој го разви фармацевтската компанија „Реџенерон“, а се препорачува да се применува за возрасни и стари лица, како и некои деца, кои се позитивни на вирусот, а кај кои постои висок ризик за напредување на болеста.
Третманот се состои од давање т.н. моноклонални антитела кои претставуваат копии на антителата кои треба да го спречат вирусот да ги нападне здравите клетки во организмот.
Од компанијата посочуваат дека клиничките испитувања упатуваат на тоа дека третманот е најкорисен кога се применува во раната фаза од заболувањето односно бргу по дијагностицирањето на ковид-19 кај пациентот.
Очекувањата на „Реџенерон“ се дека до крајот на овој месец ќе произведе дози за третман на околу 80 000 пациенти, во првата недела од јануари 2021, пак, би имале околу 200 000, додека до крајот на јануари третманот би можел да се примени на околу 300 000 пациенти.
Во меѓувреме, Монсеф Слауи, главниот човек во тимот на американскиот претседател за брзото производство на вакцината, рече дека првите Американци можат да ја примат вакцината на 11 декември.
Слауи рече дека доколку вакцината биде одобрена, може да се даде следниот ден.
„Нашиот план е да можеме да ги доставиме вакцините на местата за имунизација во рок од 24 часа по одобрувањето, па претпоставувам дека тоа би можело да биде вториот ден по одобрувањето на 11 или 12 декември“,
рече тој за Си-Ен-Ен.
Групите со највисок приоритет, вклучително здравствени работници, старите лица и лица со други болести, ќе бидат првите кои ќе примат вакцина.