Италијанскиот амбасадор во земјава, Карло Ромео во интервју за МИА, вели дека неговата земја одлично се справува со коронавирусот. Тој посочува дека земјата е максимално транспарента и е во постојана комуникација со меѓународните партнери.
„Само 0,05 проценти од италијанската територија и 0,089 отсто од италијанското население подлежат на рестриктивни мерки“,
вели амбасадорот Ромео.
Според него, состојбата не е толку сериозна како што е опишано во некои медиуми, со оглед на тоа дека 80 отсто од заразените имаат само благи симптоми, 15 проценти закрепнуваат преку медицински третман и само пет отсто имаат посериозно симптоми, честопати како последица од претходно компромитирана здравствена состојба.
„Сведоци сме на загрижувачко ширење на неточни и алармантни вести за состојбата во нашата земја во врска со овој здравствен проблем. Таквите вести не ја отсликуваат реалноста, а тоа е дека сепак, сериозната појава на ширењето на вирусот е во значителна мерка ограничена само на некои зони во мал број региони“,
вели италијанскиот амбасадор.
Тој изрази очекување дека мерките преземени од пријателските земји ќе се засноваат на рационалност и ќе произлезат од дијалог и од проценки засновани врз објективни и научни податоци.