Од партијата на Арбен Таравари обвинија дека актуелните претставници на Албанците во државата, односно коалицијата ВЛЕН, ги изневерила нивните очекувања, меѓу другото, затоа што го стагнирале процесот на евроинтеграција на земјава
Крилото на Алијанса за Албанците (АА) предводено од Арбен Таравари го охрабрува премиерот Христијан Мицкоски што поскоро да го повика Собранието да распише предвремени парламентарни избори со цел, како што велат од партијата, да се деблокира евроинтегративниот процес.
Од партијата на Таравари обвинија дека актуелните претставници на Албанците во државата, односно коалицијата ВЛЕН, ги изневерила нивните очекувања, меѓу другото, затоа што го стагнирале процесот на евроинтеграција.
„Наместо длабоки реформи, создаде срамни блокади. ВЛЕН ја презеде одговорноста за отстранување на ‘балансерот’ и го замени со скандалозен закон за фер и соодветна застапеност, спречувајќи вистински реформи. Не го исполнија ветувањето за уставни измени иако самите лидери на ВЛЕН декларативно имаа услов за оваа влада, дури и се заканија дека ќе ја напуштат владата ако уставните промени не се спроведат, што не се случи. Дозволија деградација на албанскиот јазик во институциите и донесоа институционално понижување за Албанците“,
велат од АА на Таравари.
Оттаму велат дека постојано предупредувале оти владата со ВЛЕН нема политички капацитет, ниту волја да ги претставува граѓаните, особено Албанците, и да ја придвижува земјата напред на патот кон ЕУ.
„Затоа повикуваме на граѓаните да им се дозволи да ја земат својата судбина во свои раце преку нови, слободни, фер и демократски избори, да одлучат кому ќе му веруваат да ги претставува правилно и да ги казнат со глас оние што ја изневериле нивната доверба со тоа што не ги исполниле своите ветувања, почнувајќи од ВЛЕН. Во овој политички и дипломатски ќор-сокак, во ова време на длабока економска и социјална криза, изборите не се само опција, тие се единственото решение“,
велат од АА.