Села и Гаши рекоа дека овој филм е веќе виден во 2011 година, кога Ахмети и Груевски го одложија пописот
Алијанса за Албанците и Алтернатива не се согласуваат со одложувањето на пописот што беше договорено на вчерашната средба на лидерите на СДСМ и ВМРО-ДПМНЕ и ќе направи сѐ за да не се случи тоа.
Лидерите на двете партии, Зијадин Села и Африм Гаши, на денешната прес-конференција најавија дека ќе го искористат Бадентеровиот принцип да го блокираат одложувањето на пописот.
Гаши рече дека одложувањето е на штета на Албанците во земјава.
„Од вчерашната средба има една добра и една лоша вест. Лошата вест е дека Заев и Мицкоски се договараа како никој друг да не постои во оваа држава, што е лошо за институциите и за таа мала демократска култура. Лошо е и тоа што албанскиот субјект во власта, ДУИ, исто како и во 2011 година кога Ахмети се договори со Груевски, по 10 години ова го направи и со Заев“,
рече Гаши и додаде дека Албанците во оваа држава не се сирачиња и има партии во опозицијата што ќе го заштитат нивното право.
Села, пак, кажа дека се работи за веќе виден филм.
„Како и во 2011 година со Груевски, Ахемти сега тоа го прави со Заев. Ова е само втора епизода од ист филм“,
рече Села.
Тој оцени дека прекинување на веќе почнат попис е кршење на законите и ќе се обратат до сите институции, меѓу кои и до Обвинителството.