Од МНР најавија дека ќе го повикаат македонскиот амбасадор во Тирана Данчо Марковски на итни консултаци во Скопје, по што, посочија дека ќе одлучат какви чекори ќе бидат преземени во иднина. Според информациите на одредени медиуми, се очекува утре амбасадорот Марковски да присуствува на состанок во МНР
Во прегледот за пописните резултати, албанскиот институт за статистика ИНСТАТ го коригирал името на етничката припадност на македонското национални малцинство, па наместо како претходно името на државата-Северна Македонија на албански и „Северномакедонци“ на англиски, сега стои Македонци.
Ваквата корекција доаѓа по рекација на македонското Министерство за надворешни работи (МНР), како и по средбата на министерот Тимчо Муцунски која уште вчера ја имал со неговиот албански колега Игли Хасани на форумот во Дубровник.
Муцунски вчеравечер соопшти дека употребата на терминот „северномакедонци“ во графата за националност на пописот во Албанија е техничка грешка, а посочи дека разговарал со албанскиот министер за надворешни работи, присутен на форумот во Дубровник и изрази благодарност за брзата интервенција со која грешката е исправена.
„Заедно со претседателот на Владата – Мицкоски, ја следевме ситуацијата. Имавме во неколку наврати комуникација и со службите во Министерството за надворешни работи. Утврдивме некои прашања за коишто како држава имаме сериозна грижа, тие беа денес и јавно воочени во објава којашто ја имаше од страна на МНР. Тука е и колегата Хасани, албанскиот министер за надворешни работи. Стапив во контакт со него. Тој потоа стапи во контакт веројатно со соодветните служби во соседна Албанија. Информираше дека по однос на тоа прашање се работело за техничка грешка. Искрено ќе кажам дека сум му благодарен за брзата интервенција“,
рече тој.
Од МНР најавија дека ќе го повикаат македонскиот амбасадор во Тирана Данчо Марковски на итни консултаци во Скопје, по што, посочија дека ќе одлучат какви чекори ќе бидат преземени во иднина. Според информациите на одредени медиуми, се очекува утре амбасадорот Марковски да присуствува на состанок во МНР.
Претходно, покрај за употребата на терминот „северномакедонци“, Министерството за надворешни работи реагираше и за прелиминарните резултати од пописот, кои, како што посочија, не ја отсликуваат реалната бројка на етнички Македонци во Албанија.
Според податоците од спроведениот попис кои вчера ги објави албанскиот институтот за статистика ИНСТА, во Албанија живеат повеќе Бугари од Македонци. Имено, според пописот, во Албанија живеат 2 281 Македонец, а како Бугари се изјасниле 7 957 лица. Ова е првпат на попис во Албанија да се попишат лица од бугарска националност. Во сите досегашни 11 спроведени пописи ниту еден жител на Албанија не се изјаснил како Бугарин. На последното пребројување во 2011 година околу 5 500 луѓе во Албанија се декларирале за Македонци.
„Друштво Преспа“, организација за заштита на правата на Македонците во Албанија вчера порача дека ги отфрла прелиминарните пописни резултати во Албанија, како и дека ги смета за груб пописен фалсификат.