Освен за енергетската криза, шефицата на ЕК, Фон дер Лајен и албанскиот премиер Еди Рама разговарале и за претстојниот самит на ЕУ и земјите од Западен Балкан што треба да се одржи на 6 декември во Тирана. Фокусот на разговорите на самиотот, како што најави Лајен, ќе биде војната во Украина и нејзините последици
Албанија ќе добие помош од Европската Унија во износ од 80 милиони евра за да се справи со енергетската криза, објави претседателката на Европската комисија (ЕК) Урсула фон дер Лајен на заедничката прес-конференција со албанскиот премиер Еди Рама во Тирана.
Шефицата на ЕК кажа дека одговорот на оваа кризна ситуација ќе биде многу поширок од обична буџетска поддршка, а ја спомена и солидарноста меѓу Европската Унија и Балканот.
„Одлучивме дека единствениот одговор до кој можеме да дојдеме е преку единство и солидарност. Ние сме дел од енергетска унија и затоа предлагаме пакет за поддршка на енергијата во Западен Балкан за да помогнеме во ублажувањето на високите цени на енергијата за бизнисите, семејствата и граѓаните. Станува збор за грант од 80 милиони евра, што ќе дојде во јануари. Вториот дел од поддршката ќе биде на среден и на долг рок. Станува збор за 500 милиони евра грантови за инвестирање во енергетската инфраструктура низ целиот регион“,
рече таа.
Премиерот Рама се заблагодари на Европската Унија за помошта, но се чини дека ја оцени како недоволна.
„Тие 80 милиони евра не ни се доволни, но сепак се важна помош и ние сме благодарни. Колку ова ќе придонесе за заштита на цените на потрошувачите? Околу една шестина. Ако погледнеме наназад на оваа година, ни требаа вкупно 460 милиони евра енергија. Тоа е неверојатна сума, но помогна со инфлацијата. Албанија има најниска инфлација во регионот, а една од причините е што имаме финансиски штит за цената на енергијата“,
потенцира Рама.
На заедничката прес-конференција, Рама и Фон дер Лајен соопштија дека разговарале и за самитот на Европската Унија и земјите од Западен Балкан што ќе се одржи на 6 декември во Тирана.
„Ќе разговараме за геополитичката ситуација и за тоа како дополнително ќе ја поддржиме Украина. Мислам дека на овој самит посебно место ќе има и енергијата, но и инфраструктурата и како ќе продолжиме да се справуваме со кризата“,
изјави Фон дер Лајен.
Премиерот Рама рече дека секој ден се гледа позитивна синергија меѓу Европската Унија и Западен Балкан.
„Едвај чекам сите лидери на ЕУ да се симнат во Тирана, бидејќи оние од Балканот често доаѓаа. Ајде да разговараме што треба да правиме заедно. Иако не сме во ЕУ, тие сфатија дека и ние сме Европејци и ја делиме истата судбина во големите работи. Имаме историски напредок во односите меѓу регионот и ЕУ, а Албанија има водечка улога“,
рече Рама.
Одржувањето на овој самит пред неколку дена го најави претседателот на Европскиот совет, Шарл Мишел, кој истакна дека Западен Балкан е клучен приоритет на Европската Унија.
По посетата на Северна Македонија, Косово и Албанија, претседателот на ЕК треба да ги посети Босна и Херцеговина, Србија и Црна Гора.