За градот Скопје и за Тетово стапуваат во сила владините препораки и мерки против аерозагадувањето. Причина за тоа е фактот што, според податоците од Државниот автоматски мониторинг-систем за квалитет на амбиенталниот воздух и добиената временска прогноза од Управата за хидрометеоролошки работи, прагот на алармирање за PM 10 (надминување на вредноста од 175 mg/m3 во текот на два последователни дена) е надминат на мерните места во Скопје – Карпош и Лисиче и во Тетово.
ОСЛОБОДЕНИ ОД РАБОТА СЕ БРЕМЕНИТЕ ЖЕНИ, ПОСТАРИТЕ ОД 60 ГОДИНИ И ЛИЦАТА СО ПРЕЛЕЖАН ИНФАРКТ ИЛИ МОЗОЧЕН УДАР
Им се препорачува на сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар. Сите правни субјекти (работодавци) да го реорганизираат работното време и лицата што работат на отворено да работат од 11 до 17 часот. Министерство за труд и социјална политика, во соработка со Црвениот крст, Здравствениот дом и единиците за локална самоуправа, да обезбеди прифатилишта за сместување бездомници и да им даде поддршка на стари осамени лица преку организирани посети.
ДА НЕ СЕ ОРГАНИЗИРААТ МАНИФЕСТАЦИИ НА ОТВОРЕНО
Владата препорачува да не се организираат спортски натпревари и други културни манифестации на отворено, како и да се обезбедат услови за зголемени активности на службите за итна медицинска помош, домашна посета и патронажна служба. Исто така, министерството за здравство треба да ја задолжи Службата за итна медицинска помош да доставува информација за бројот на повици за времетраењето на алармантното загадување на воздухот на дневна основа сè до завршување на загадувањето и една недела по завршувањето, се вели во препораките.
ДРЖАВНИТЕ И ЛОКАЛНИТЕ ВЛАСТИ ДРАСТИЧНО ДА ЈА НАМАЛАТ УПОТРЕБАТА НА СЛУЖБЕНИ ВОЗИЛА
Владата на Република Северна Македонија ги задолжува сите органи на државна управа, агенциите, фондовите, бироата, заводите, јавните претпријатијата и АД во државна сопственост, како и на единиците на локална самоуправа да ја намалат (до 50 проценти) употребата на службените возила. Единиците на локалните самоуправи се должни да ги спроведат мерките пропишани во краткорочните планови или краткорочните мерки донесени на советите на општините. Градежните компании имаат обврска да користат вода за намалување на прашината при градежни активност (прскање, миење гуми пред излез од градилиште, а градежните машини (багери, булдожери, виљушкари) да се пренесат до градилиштата до 7:30 часот наутро.
ЗАСИЛЕНИ КОНТРОЛИ НА ИНСПЕКТОРАТОТ ЗА ЖИВОТНА СРЕДИНА
Државниот инспекторат за животна средина да започне со вршење зачестена контрола на Инсталациите што поседуваат А-интегрирани еколошки дозволи, да спроведе контролни мерења на емисиите на загадувачки супстанции во амбиенталниот воздух со акредитирана лабораторија со цел да се утврди дали се применуваат пропишаните услови/мерки во дозволата по однос на емисиите во воздух. Министерството за животна средина и просторно планирање, пак, треба да подготви и достави препорака до инсталациите што поседуваат А-интегрирана дозвола дозвола, за намалување на капацитетот на производство (до 50 проценти) со што од оваа мерка ќе бидат исклучени инсталациите што произведуваат топлинска или електрична енергија.