Ублажувањето на мерките од 27 април би опфатило дозвола за работа на угостителските објекти во отворените делови, како тераси и градини, и скратување на полицискиот час, кој од 20 би почнувал од 21 часот. Меѓутоа, услов е да продолжи опаѓањето на бројот на новозаразени и хоспитализирани пациенти
Од владината прес-служба и официјално потврдија дека Главниот кризен координативен штаб, по предлог на Комисијата за заразни болести, донел одлука да ѝ препорача на Владата за уште една недела, односно до 27 април да ги продолжи актуелните рестриктивни мерки.
Ваквата одлука треба да биде усвоена и на владина седница, која најверојатно ќе се одржи утре.
Доколку продолжи трендот на опаѓање на бројот на новозаразени и хоспитализирани пациенти, ќе се разгледува предлогот на Комисијата за ублажување на мерките од 27 април. Таквото ублажување опфаќа:
- во периодот од 27 април 2021 година (вторник), заклучно со 15 мај 2021 година (сабота), да се отворат угостителските објекти за работа со посетители/гости во отворениот дел од угостителскиот објект (само летни тераси, градини, а не во затворениот дел);
- забраната и посебниот режим на движење да почнува од 21 часот до 05 часот наредниот ден;
- да ги разгледа можностите при намалување на рестриктивните мерки да се дозволи организирање на спортски тренинзи организирани од страна на фитнес-центри/клубови на отворен простор (наместо во затворена спортска вежбална/сала);
- други мерки во зависност од епидемиолошките текови и состојби во државата.
Сепак, нагласуваат од Владата, овие предлози ќе се разгледуваат исклучиво под услов да продолжи трендот на опаѓање.
До 27 април, како што е веќе познато, ќе бидат на сила актуелните мерки, што утре треба да биде потврдено и на владина седница, а тие се: полициски час од 20 часот до 5 часот наутро; затворени угостителски објекти, кои може да работат само со продавање храна преку штанд или со достава; работа на обложувачниците само преку шалтер или пулт; затворени фитнес-центри и спортски сали и забраната за семинари, обуки и конференции.