Не е во прашање да се каже тоа што му некому одговара туку најважно е дека треба да се ориентираме правилно, да научиме од минатото, беше одговорот на Ахмети за тоа дали треба да се забрани слободата на говор и да не се кажува ништо што нему не му одговара
Граѓаните треба да бидат правилно ориентирани. Мојата изјава не се однесуваше на телевизиите туку на различните реакции што постојат помеѓу граѓаните, беше одговорот што лидерот на ДУИ, Али Ахмети, го даде на денешното новинарско прашање дали ќе им се извини на телевизиите Телма и Алфа, кои ги нарече антиалбански.
Ахмети за тоа дали треба да се забрани слободата на говор и да не се кажува ништо што нему не му одговара, рече дека не е прашањето тоа што некому му одговара да се каже.
„Не е во прашањето да се каже тоа што некому му одговара туку најважно е дека треба да се ориентираме правилно, да научиме од минатото“,
рече Ахмети.
На прашањето да го каже неговиот личен став и дали смета дека со изјавата е загрозен интегритетот на медиумите и безбедноста на вработените во овие две редакции, Ахмети додаде дека тоа не се однесува на медиумите туку дека имаме колективна одговорност како да се справуваме со општествените одговорности.
Конкретен одговор Ахмети не даде ни на прашањето: „Дали знае дека кој сè чепнал со медиумите не останал на власт уште долго?“
„Да ја кажеш вистината, знам дека е болно. Но, имаме одговорност како политички партии, како општество, како медиуми, за тоа како ги ориентираме граѓаните“,
одговори Ахмети пред почетокот на одбележувањето на 555-та годишнина од смртта на Скендер бег на плоштадот во Скопје кој го носи неговото име.
Лидерот на ДУИ, Али Ахмети, на трибина во Гостивар во неделата порача дека телевизиите Телма и Алфа биле „непријатели на Албанците“.
„Кому му служиме со овие поделби што се прават? Се разбира, на непријателите на Албанците, тие аплаудираат, Алфа, Телма, мелма, тоа се тие. Што добија Албанците кои беа поделени во минатото, што? Не добија ништо“,
рече Ахмети.
По ова, од ДУИ испратија соопштение во кое објаснија дека лидерот Ахмети не спомнал непријателски медиуми, туку агресивни непријателски тонови од страна на граѓаните.
„На синоќешниот собир со граѓаните во Гостивар, претседателот на Демократската унија за интеграција, г. Али Ахмети зборуваше за недостигот на ангажман од страна на македонските политички партии со граѓаните во контекст на односите со Албанците, затоа што е вознемирувачка омразата кон албанските лидери на државните институции, која се прикажува од македонските граѓани во контактните емисии на македонските телевизии со етикети како Бугар Османи, Артан Груби терористот, навреди кон самиот Али Ахмети и другите. Тоа е последица на неработењето на македонските политички партии со граѓаните и намерното продлабочување на поделбите помеѓу народот. Г. Ахмети не спомна непријателски медиуми, туку агресивни непријателски тонови од страна на граѓаните, поттикнати од политичките партии во контактните емисии на овие телевизии“,
се наведуваше во соопштението на ДУИ.
За изјавата на Ахмети вчера реагираа новинарските здруженија и Агенцијата за аудио и аудиовизуелни медиумски услуги.
Премиерот Димитар Ковачевски, на вчерашната прес-конференција во Владата, прашан како ја коментира изјавата на неговиот коалициски партнер, лидерот на ДУИ Али Ахмети, дека Алфа и Телма се „непријатели на Албанците“, и самиот искритикува некои телевизии за тоа како се однесуваат.
„Што се однесува до мене, можам да кажам дека во државата има медиум чијашто уредувачка политика повеќе наликува на уредувачка политика која тргува со енергенси, а има и медиум чијашто уредувачка политика повеќе личи на уредувачка политика на партиски сектор за комуникација“,
рече Ковачевски.