Судејќи според националните и анкетите по држави, претседателските избори во САД што се одржуваат денеска можат да бидат едни од најнеизвесните во американската историја
Мојата порака како амбасадор на Соединетите Држави овде во Македонија е мошне јасна, како што беше тоа случај и со вашите избори. Апсолутно е важно секој граѓанин да излезе и да гласа, изјави американската амбасадорка Анџела Агелер прашана кои се нејзините очекувања и што може да им порача на нејзините сограѓани за денешните претседателски избори во САД.
Одговарајќи на новинарското прашање, Агелер рече дека гласањето во една демократија е света должност и огромна привилегија.
„Јас гласав. Со нетрпение чекам и се надевам на мирна и фер транзиција на власта, тоа е она што го очекуваме. И јас, како и сите вие со нетрпение чекам да видам кој ќе победи. Ќе гледаме заедно“,
рече Агелер која денеска присуствуваше на конференција за соработка на полицијата и царината на високо ниво.
Во САД денеска се одржуваат 60. претседателски избори, а гласачите одлучуваат кој од двајцата кандидати, актуелната потпретседателка Камала Харис или поранешниот претседател Доналд Трамп ќе седне во Овалната соба во Белата куќа.
Харис, демократската потпретседателка, и Трамп, републиканскиот поранешен претседател, кој бара втор четиригодишен мандат, ги поминаа последните настани од кампањата изнесувајќи ги своите ставови пред гласачите во седумте критични држави кои веројатно ќе го одлучат победникот.
Двајцата кандидати вчера ги одржаа и последните митинзи. Камала Харис беше во Филаделфија, Пенсилванија, додека Доналд Трамп го одржа својот последен говор во градот каде што го направи тоа и во 2016 и во 2020 година, во Гранд Рапидс, Мичиген.
Околу 240 милиони луѓе имаат право да гласаат на изборите, кои исто така ќе одлучуваат за составот на двата дома на Конгресот – Претставничкиот дом и Сенатот. Која партија ги контролира нив ќе има големо влијание врз агендата на политиката на идниот претседател.
По затворањето на гласачките места, во зависност од тоа колку се блиску резултатите, можно е победникот да не се знае неколку часа, денови, па дури и недели.
Судејќи според националните и државните анкети, разликата меѓу Доналд Трамп и Камала Харис може да биде многу мала на некои места, што би можело да бара пребројување, пишува Би-би-си.
Исто така, можно е некои резултати да доаѓаат побавно оваа година поради промените во начинот на кој поединечни држави – вклучително и седумте клучни што на крајот ќе одлучат за трката – ги спроведуваат изборите од 2020 година.
Првите избирачки места низ САД ќе се затворат во вторник навечер на полноќ по наше време (18:00 часот по EST), а последните избирачки места ќе се затворат рано наутро во среда во д7 часот по наше време (1:00 часот по EST).
Вообичаено, прво се пребројуваат гласовите дадени на денот на изборите, потоа предвремените гласови и гласовите испратени по пошта, па следи пребројувањето на спорните гласови, и на крај гласовите од дијаспората и војската.
Новоизбраниот претседател ќе го започне својот мандат откако ќе биде инаугуриран во понеделник, 20 јануари 2025 година. Тоа ќе биде 60-та претседателска инаугурација во историјата на САД.
На настанот, новиот претседател ќе положи заклетва, ќе вети дека ќе го почитува Уставот, а потоа ќе го одржи својот инаугуративен говор.