„Мислам дека е од критична важност тие разговори да се смират, лидерите од двете страни на границата да можат да дискутираат смирено и рационално, за тоа кој е патот напред, во врска со некои од овие проблеми кои ги видовме помеѓу различни индивидуи и заедници. Тоа е од критична важност. Но, дали тоа треба да го запре или дури и да го одложи напредокот кон ЕУ? Не мислам дека треба“, вели американската амбасадорка во интервју за Телма ТВ
Американската амбасадрока во земјава, Анџела Агелер, смета дека последните случувања на релација Скопје – Софија не треба да бидат пречка, односно да го запрат или одложат напредокот на Северна Македонија кон Европска Унија (ЕУ).
Таа во интервју за Телма ТВ изјави дека е од критична важност да се смират разговорите меѓу С Македонија и Бугарија за лидерите од двете страни на границата да можат да дискутираат рационално за тоа кој е патот напред.
„Луѓето во државата секој ден можат да ги видат тие конфликти и ескалацијата кај дел од дијалогот што ја сведочиме помеѓу оние во Софија и овие овде. Мислам дека е од критична важност тие разговори да се смират, лидерите од двете страни на границата да можат да дискутираат смирено и рационално, за тоа кој е патот напред, во врска со некои од овие проблеми кои ги видовме помеѓу различни индивидуи и заедници. Тоа е од критична важност. Но, дали тоа треба да го запре или дури и да го одложи напредокот кон ЕУ? Не мислам дека треба“,
рече Агелер, одговарајќи на прашањето колку е можно во ваква атмосфера да се постигне консензус меѓу политичките партии во Собранието за уставните измени.
Американската амбасадорка го поздрави потегот на министерот за надворешни работи, Бујар Османи, да замине во Софија и да разговара со својот колега и со други лидери во Бугарија, по инцидентот во кој беше претепан секретарот на бугарскиот клуб „Цар Борис Трети“, што повторно ги вжешти односите меѓу двете држави.
„Го поздравувам министерот за надворешни што отиде во Софија и што разговараше со тамошното Министерство за надворешни работи и со други лидери, за тоа како да се поддржат малцинските заедници овде во Северна Македонија и како двете држави да постигнат напредок во надминувањето на какви било точки на притисок помеѓу двете влади за да можат луѓето од оваа земја да го продолжат напредокот во нивните европски аспирации“,
рече Агелер.
Во врска со нејзините разговори со партиските лидери за нивните заложби за евроинтегративните процеси, Агелер вели дека ваквите средби се многу корисни и од критична важност.
„Мислам дека е многу корисно, затоа што можам директно од нив да ги слушнам нивните мислења, мислењата на нивните членови на Собранието, нивните гласачи и како тие гледаат на моменталната ситуација во земјата. Значи, нормално е американските амбасадори да разговараат со луѓе од целиот политички спектар. Мислам дека тоа е од критична важност“,
вели Агелер.
Дополнително, тоа што е исто така важно, додаде таа, е што на овие средби може да ги сподели своите гледишта и гледиштата на Вашингтон, за лидерите на партиите „многу јасно да знаат што застапуваат САД“.
„А, тоа што го застапуваат САД и што го застапува амбасадата е силна поддршка за патот кон ЕУ. Дали за тоа се потребни некои тешки одлуки и некој тежок избор, уште еднаш, од страна на лидерите и народот на оваа земја? Да, потребни се. Но, јас верувам дека оваа земја е способна да одговори на задачата и затоа, за мене е важно не само тоа што можам да слушнам, туку и да споделам, многу искрено и отворено, кој според нас е најдобриот пат напред, за оваа држава и за нејзиниот народ“,
вели американската амбасадорка во интервјуто.