По претседателот на Собранието, и координаторот на ДУИ смета дека средбите надвор од институциите не се најсоодветно решение за надминување на отворените прашања меѓу политичките партии
Пратеникот Арбер Адеми, кој од неодамна и формално е координатор на пратеничката група на ДУИ, изјави денеска дека неговата партија секогаш поддржува политички дијалог, ама дека е посоодветно политичките партии да се фокусираат на координации во Собранието отколку прашањата да се решава на лидерски средби.
„Секогаш е време за дијалог и консензус меѓу политичките партии. Но останувам на ставот дека треба уште повеќе, уште поодговорно да се концентрираме на формалните и неформалните координативни состаноци кај претседателот Талат Џафери, бидејќи се работи за парламентарни политички партии, за кочење на работата на Собранието и мислам дека парламентот е местото каде што би требало да се елиминираат сите разлики за евтини политички поени од неодговорни парламентарни политички партии. Но, секако, како политичка партија, секогаш сме поддржувале дијалог без оглед на форматот и без оглед на тоа кој свикува одредена средба“,
рече Адеми.
Адеми коментираше и во врска со пописот и посочи дека операцијата веќе се реализира, така што во моментов се попишува дијаспората, а од 1 април почнува теренското попишување.
„Од 1 април и теренски ќе се реализира пописот. Ние зборуваме за позитивно законско решение, позитивен законски акт кој е во сила, кој е усвоен и кога се донесува одреден закон треба силно и одговорно да се испочитува“,
изјави Адеми.