Од ВМРО-ДПМНЕ не потврдуваат, но и не демантираат дека на вчерашната седница на ИК се отворило и прашањето за статутарните промени, како можност партиското раководство да ги зацврсти позициите во ситуација кога изборниот резултат не му овозможува предност на Мицкоски за добивање на мандатот за формирање влада
Од ВМРО-ДПМНЕ не потврдуваат, но и не демантираат дека на вчерашната седница на Извршниот комитет на партијата се разговарало и за измените на партискиот Статут, кои лидерот Христијан Мицкоски ги најави уште при преземањето на партиското кормило, но досега не беа донесени.
Иако има информации дека, освен што ИК донел одлука за анализа на изборните резултати и го овластил Мицкоски да влезе во преговори за формирање на идната влада, се отворило и прашањето за можни статутарни измени, од ВМРО-ДПМНЕ велат дека во партиското соопштение е наведено сѐ за што се разговарало на редовната седница.
„Сѐ што беше разговарано на вчерашната редовна седница на ИК беше посочено во партиското соопштение кое го испративме по седницата. Не би имал повеќе да додадам“,
ни изјави Димче Арсовски, портпарол на ВМРО-ДПМНЕ.
Статутарната комисија на ВМРО-ДПМНЕ уште во декември 2017 година, веднаш по изборот на Мицкоски за лидер на конгресот во Валандово, ја почна процедурата за измена на партискиот Статут, со цел, како што беше тогаш најавено, демократизација и модернизација на партијата. Подоцна беше најавено и дека во новиот статут ќе се избрише „титулата“ почесен претседател, што би значело и тивко расчистување со „ликот и делото“ на претходниот долгогодишен партиски водач и премиер Никола Груевски.
Меѓутоа, статутарните измени не беа донесени во изминатите две и пол години, а таа тема повторно се наметнува по завршувањето на овие избори, на кои СДСМ, со коалицијата што ја формираше, првпат по 18 години оствари предност на парламентарни избори пред коалицијата на ВМРО-ДПМНЕ – со два мандата и околу 12 илјади гласа разлика.
По отсуството во изборната ноќ, кога се пребројуваа освоените гласови, Мицкоски се појави следниот ден и најави дека ВМРО-ДПМНЕ влегува во игра за формирање на идната влада.
И додека кругови во и околу партијата веќе почнаа да бараат оставка од Мицкоски, додека негови блиски соработници го бодрат на социјалните мрежи, ИК на ВМРО-ДПМНЕ го овласти „шпицен кандидатот за премиер“ да почне преговори за формирање на идната влада.
Постизборните одлуки што ги донесе ИК треба да ги потврди Централниот комитет на ВМРО-ДПМНЕ, на седница што треба да се одржи вечерва.
Партиски извори не исклучуваат можност ЦК да го отвори и прашањето за статутарните промени, каде што, наводно, се предвидува и нов начин на избор на раководствата на општинските комитети на партијата и на други партиски функции. Иако статутарните измени првично беа најавени како вовед во децентрализација на десничарската партија, проценките се дека можното отворање на оваа тема веднаш по изборите би било во насока на дополнителна централизација на ВМРО-ДПМНЕ, така што и Мицкоски би си ја зацврстил позицијата, и покрај послабиот изборен резултат од СДСМ, кој засега не му овозможува предност за добивање на мандатот за формирање влада.