Министерот за здравство Сашо Клековски посочи на здравата исхрана и физичката активност како најважни елементи во превенцијата и третманот на дијабетесот
Мотото на годинешното одбележување на Светскиот ден на дијабетесот, 14 Ноември, е „Рана акција за дијабетес“.
По тој повод надлежните во Македонија излегоа со порака дека бројот на заболени од дијабетес се зголемува, а раната дијагноза на дијабетесот, редовното мерење на шеќерот во крвта, редовното земање терапија и современиот третман, како и здравиот начин на исхрана и физичката активност, се клучни за спречување на компликациите од болеста.
„Во државата има 135 000 лица со дијабетес, од кои 4 000 се со тип 1 и речиси 40 000 се смета дека имаат дијабетес, а немаат поставена дијагноза. Дијабетесот е хронична болест, која зазема пандемиски размери. Меѓународната федерација за дијабетес излезе со бројки дека 693 милиони луѓе во светот го имаат ова заболување. Вџашувачки е што речиси 43 отсто од лицата со дијабетес не знаат дека ја имаат оваа хронична болест. Според податоците, приближно 50 отсто од компликациите кај дијабетес тип 2 веќе се присутни при поставување на дијагнозата. Значи, се задоцнува со поставувањето на дијагноза“,
рече директорот на Универзитетската клиника за ендокринологија, проф. д-р Ирфан Ахмети.
Тој посочи дека раното откривање е најважно и дека дијабетот тип 2 на почетокот, доколку нема високи вредности на шеќер во крвта, нема симптоми и го нарекуваме тивок убиец затоа што симптомите и знаците не секогаш се присутни.
„Обезноста е еден од главните ризик-фактори за појава на дијабетес и треба навреме да се третира за да се спречи преддијабетесот, односно дијабетесот како хроничнa компликација. За важноста на скринингот и навременото откривање на дијабетесот покажува и вчерашниот скрининг кај нашата популацијата, инициран од Македонската медицинска асоцијација на студентите, во кој учествуваа 135 лица. Забележано е дека кај 16 отсто од лицата, на кои им било извршено мерење гликемија во крвта, е поставена дијагноза дијабетес, а тие не знаеле дека го имаат“,
додаде тој.
Татјана Миленковиќ, претседателка на Здружението на ендокринологите и дијабетолозите на Македонија, рече дека превенцијата и подигањето на општата здравствена свест се најважни за рано откривање, ран третман и давање на потребната помош на пациентите со дијабетес.
„Многу се важни и соодветната терапија и контролата, односно самоконтрола на сите луѓе со дијабетес. Пристапноста до технологиите, кои драматично го промениле животот, особено на пациентите со тип 1 дијабетес, па и на тип 2 дијабетес, и пристапноста кон терапиите, кои не само што го лекуваат дијабетот, туку ги спречуваат и компликациите, не треба да биде привилегија само на одреден број пациенти, туку на сите оние на кои им се потребни“,
рече таа.
Министерот за здравство Сашо Клековски посочи на здравата исхрана и физичката активност како најважни елементи во превенцијата и третманот на дијабетесот.
„Светската здравствена организација вели дека без 30 минути физичка активност дневно, без елиминација на пушењето, алкохолоти без соодветна исхрана не можеме да очекуваме здравје, не можеме да очекуваме одржливост на здравствените системи“,
рече тој.
На денешната прес-конфернецијата беше посочено дека сензори за континуирано мерење гликоза има за сите пациенти со дијабетес на возраст до 25 години, чиј број изнесува 800. Од нив, 350 се деца, а другите се на возраст од 18 до 25 години.