Посочи дека функцијата градоначалник ја носи со длабока почит кон жртвата на ослободителите и со решителност да работи на изградба на град во кој достоинството, солидарноста и заедништвото ќе бидат дел од секојдневието
Скопскиот градоначалникот, Орце Ѓорѓиевски, по повод 13 Ноември – Денот на ослободувањето на Скопје, порача дека споменот на борците кои ги положиле животите за слободата мора да се чува и да се пренесува на новите генерации.
Во објава на Фејсбук, Ѓорѓиевски информира дека утрово ја одржал традиционалната средба со претставници на Градскиот одбор на Сојузот на борците од Народноослободителната антифашистичка војна на Македонија.
Им се заблагодарил за посветеноста во зачувувањето на споменот на ослободителите и пренесувањето на нивното наследство на младите генерации.
Потсети дека на денешен ден, по неколкудневни тешки борби со фашистичкиот окупатор, борците од 42-та и 50-та народноослободителна дивизија и 16-та македонска бригада го ослободиле Скопје.
„Со огромна храброст и саможртва го отворија патот кон иднината на нашиот град. Нивниот подвиг живее во секое слободно утро на Скопје, во секоја генерација што расте со право да сонува, да создава и гордо да му припаѓа на својот град. Тие се изборија за слободата. Наша должност е да бидеме достојни за неа“,
вели градоначалникот.
Посочи дека функцијата градоначалник ја носи со длабока почит кон жртвата на ослободителите и со решителност да работи на изградба на град во кој достоинството, солидарноста и заедништвото ќе бидат дел од секојдневието.
„Град што ќе им го оставиме на идните генерации со гордост, свесни дека сме го дале најдоброто од себе. Нека ни биде вечен заветот на ослободителите! Да го чуваме Скопје, да го градиме и да го сакаме со дела! Вечна слава на хероите кои го донесоа 13 Ноември! Слава на борците за слободно Скопје!“,
рече Ѓорѓиевски.
Претседателот на Градската организација на Социјалдемократскиот сојуз (СДСМ), Александар Давчевски, денеска, критикувајќи го работењето на Ѓорѓиевски во првата година од мандатот, рече дека Скопје беше ослободено на 13 ноември 1944 година, а денес е заробено од неспособна и криминална власт на ВМРО-ДПМНЕ.
Според Давчевски, градот се соочува со нефункционалност, сообраќаен хаос, натрупан отпад, диви депонии и проблеми со кучињата скитници.
Оцени дека 29-минутниот отчет на градоначалникот бил обид преку партиска промоција да се прикрие лошата состојба во градот.
Градот Скопје денеска одбележува 82 години од ослободувањето во Втората светска војна.
По тој повод, во агендата на Град Скопје денеска се предвидени повеќе активности. Во 11 часот делегации ќе положат цвеќе пред Споменикот на ослободителите на Скопје на Партизанските гробишта во Бутел, а потоа и на Алејата на заслужните граѓани на гробот на генералот Михајло Апостолски на гробиштата во Бутел. Во 12:30 часот цвеќе ќе бидело положено и пред споменикот на Ослободителите на Скопје пред зградата на Владата.
Свеченото доделување на наградата „13 Ноември“ ќе се одржи вечерва во Македонската опера и балет.