fbpx
Свет

(ФОТО+ВИДЕО) Се урна зграда во Бруклин, најмалку двајца загинати и 17 повредени

360степени | 12 ноември, 2026 08:33

Зградата се урнала вчера околу 16 часот по локално време, а нејзините остатоци паднале во соседната градежна јама, каде што во тој момент се изведувале ископувачки работи

Најмалку две лица загинаа, а 17 се повредени при уривање на трикатна зграда во населбата Флетбуш во Бруклин, Њујорк, пренесува Си-ен-ен.

Четворица од повредените се наоѓаат во критична состојба. Не е познато дали меѓу загинатите има и деца.

Од местото на уривањето на зградата во Бруклин, Њујорк / Фото: EPA/SARAH YENESEL

Зградата се урнала вчера околу 16 часот по локално време. Нејзините остатоци паднале во соседна градежна јама каде што се изведувале ископувања.

Урнатата зграда на приземјето имала продавница, а горните катови биле станбени простории.

Снимките од местото на несреќата покажуваат како пожарникарите извлекуваат луѓе од купиштата урнатини, ги поставуваат на носилки и ги пренесуваат на безбедно.

Во акцијата се ангажирани околу 250 пожарникари и медицински работници, а се користат дронови и кучиња трагачи. Од урнатините биле извлечени и преживеани, меѓу кои и бремена жена.

Причините за уривањето се истражуваат. Според градските евиденции, во април изведувач на работите на соседната парцела добил казна бидејќи ги продолжил активностите за уривање и покрај наредбата за нивно запирање. Засега не е утврдено дали тоа има врска со несреќата.

Истрагата треба да утврди што довело до рушењето на објектот во соседното градилиште, каде што исто така имало заробени лица.

Градоначалникот на Њујорк, Зохран Мамдани, ја оцени спасувачката операција како исклучително сложена и опасна поради нестабилните остатоци од објектот. Ги повика граѓаните да ја избегнуваат областа додека трае интервенцијата.

©2026 360 степени, Сите права се задржани