Засега содржината на кривичните пријави не е јавно позната, а детали поврзани со нив не откриваат ниту од Народната банка ниту од Јавното обвинителство на Република Северна Македонија. Но, и од едната и од другата институција потврдуваат дека тие се поднесени
Според неофицијалните информации на дел од медиумите, станува збор за две одделни пријави, со кои се бара кривична одговорност од лидерот на СДСМ, Венко Филипче, потпретседателот на партијата Александар Трајановски, генералниот секретар Александар Саша Димитријевиќ и секретарот на Социјалдемократскиот сојуз за меѓународна соработка Андреј Жерновиски
Народната банка на Македонија поднела кривични пријави против четворица функционери од највисоко раководство на опозицискиот Социјалдемократски сојуз на Македонија во врска со јавно изнесени сериозни обвинувања поврзани со Алта банка АД Битола.
Засега содржината на кривичните пријави не е јавно позната, а детали поврзани со нив не откриваат ниту од Народната банка ниту од Јавното обвинителство на Република Северна Македонија. Но, и од едната и од другата институција потврдуваат дека тие се поднесени.
„Народната банка поднесе пријави до Основното јавно обвинителство Скопје поради јавни изјави со сериозни и непоткрепени обвинувања поврзани со Алта банка АД Битола“,
навеле од прес-службата на Народната банка во краток одговор на прашање на телевизија Сител.
Според неофицијалните информации на телевизијата, станува збор за две одделни пријави со кои се бара кривична одговорност од лидерот на СДСМ, Венко Филипче, потпретседателот на партијата Александар Трајановски, генералниот секретар Александар Саша Димитријевиќ и секретарот на Социјалдемократскиот сојуз за меѓународна соработка Андреј Жерновиски.
Телевизијата Телма, исто така, повикувајќи на неофицијални информации од свои извори, објави дека едната кривичната пријава се однесува на Филипче, Трајановски и Димитријевиќ, додека посебна пријава е поднесена против Жерновски.
Лидерот на СДСМ денеска, одговарајќи на новинарско прашање, кажа дека нема информации за пријавите.
„Првпат слушам за оваа работа сега“,
рече Филипче на прес-конференција во Собранието.
Од републичкото јавно обвинителство потврдија дека кривичните пријави ги примиле вчера, но засега не споделуваат повеќе информации.
Опозицискиот Социјалдемократски сојуз на Македонија од појавувањето на случајот со Алта банка АД Битола, кој настана како рефлексија на одземањето на дозволата за работа на Алта банка АД Белград и отворањето истрага од страна на српските органи против нејзиниот сопственик Давор Мацура, кој е во притвор, преку серија прес-конференции и соопштенија изминатиот период бара одговорност од премиерот Христијан Мицкоски и гувернерот на Народната банка на Македонија, Трајко Славески, во врска со влегувањето на српската банка во Македонија. Од СДСМ отворија и низа прашања за последиците од случувањата со Алта банка откако Народната банка во земјава воведе привремена административна управа во банката.
Премиерот Христијан Мицкоски, одговарајќи на новинарско прашање кон крајот на минатата недела, побара од Обвинителството да отвори истрага бидејќи, како што рече, опозицијата врши саботажа, креира немир и го урива уставниот и државниот поредок.
„Редно е, согласно Кривичниот законик, Јавното обвинителство да се позанимава за делото саботажа кое го прави опозицијата, свесно го урива Уставот и државниот поредок ширејќи невистини, крерирајќи немир и на тој начин ги доведува граѓаните во чувство на несигурност и исплашеност. Ова кривични дело, ќе потсетам, се казнува со казна затвор од најмалку три години и по оној КЗ (Кривичен законик н.з.), кој тие го сменија во 2023 година“,
рече премиерот на 5 ноември одговарајќи на новинарско прашање на заедничката прес-конференција со евроамбасадорот Михалис Рокас по повод објавувањето на Извештајот на Европската комисија за напредокот на Македонија на патот кон ЕУ.
Пратеничката од СДСМ и претседателка на Комисијата за финансирање и буџет, Сања Лукаревска, на денешната надзорна расправа во Собранието посветена на состојбите во Алта банка АД Битола упати критики до гувернерот Трајко Славески и побара негова итна оставка.
Во поставувањето прашање до Славески, Лукаревска се осврна на повеќе прашања, од начинот на издавање на согласноста за купување на банката, преку санкциите од европските регулатори, па сè до воведениот лимит за повлекување средства за граѓаните.
Во својот одговор, гувернерот Трајко Славески нагласи дека Народната банка постапила строго во рамките на законските надлежности и овластувања. Тој истакна дека процесот на лиценцирање и давање согласност траел во рамките на максималниот законски рок од три месеци, при што низ четири нивоа во институцијата биле извршени минуциозни анализи. Според него, во постапката била остварена директна комуникација со домашни и странски институции, а проверките биле следени преку меѓународни глобални платформи.
Славески не даде конкретен одговор за барањето на Лукаревска за негова оставка. Само рече дека дека секој има право на свое мислење, а во однос на утврдениот лимит за коминтентите на банката, рече дека првичните ограничувања се олабавуваат.