„За беспрекорното спојување на хуморот, трагедијата и драмата, за човечноста и сочувството што ги покажува кон своите ликови, за сложениот, но кохерентен филм, кој истовремено успева да биде трогателен и разигран, големата награда на Токио – Наградата на гувернерот на Токио за најдобар филм – му се доделува на ‘Сестра, брат и шахта’“, истакна претседателот на жирито, Ролф де Хер
Најновиот игран филм на реномираниот македонски режисер Милчо Манчевски, „Сестра, брат и шахта“, ја освои главната награда „Токио гран при“ на престижниот Меѓународен филмски фестивал во Токио (TIFF).
Ова е првпат македонски филм да победи на фестивал од А-категорија по „Пред дождот“ на Манчевски во Венеција 1994 година.
Годинава на адреса на фестивалот во Токио пристигнале 1 892 филма од 112 земји и региони, од кои по ригорозен процес на селекција само 15 се пласирале во главната натпреварувачка програма.
Меѓународното жири, предводено од истакнатиот австралиски режисер Ролф де Хер и составено од врвни филмски професионалци од САД, Јужна Кореја, Јапонија и Франција, едногласно му ја додели престижната награда на македонскиот филм.
Претседателот на жирито, Ролф де Хер, при доделувањето на наградата го прочита официјалното образложение на жирито.
„За беспрекорното спојување на хуморот, трагедијата и драмата, за човечноста и сочувството што ги покажува кон своите ликови, за сложениот, но кохерентен филм, кој истовремено успева да биде трогателен и разигран, големата награда на Токио – Наградата на гувернерот на Токио за најдобар филм – му се доделува на ‘Сестра, брат и шахта’“,
истакна Ролф де Хер.
Манчевски ја сподели радоста од освоената награда и им се заблагодари на сите што верувале во создавањето на филмот.
„Многу ми е мило што светот ја сака нашата шахта. Благодарност до феноменалната екипа, глумците, финансиерите, спонзорите – за довербата во еден чуден филм. Ете пример дека истрајноста и правдата победуваат. Напред, шахта!“,
изјави Манчевски по доделувањето на гран при наградата.
На свеченото затворање на фестивалот наградата ја подигнаа главните актери во филмот Сара Климоска, Филип Трајковиќ и продуцентот Јане Ќортошев.
По доделувањето на наградата, на сцената се обрати и продуцентот на филмот, кој во име на авторската и продуцентската екипа им се заблагодари на сите што верувале во проектот и го поддржале неговото создавање.
„Во Токио дојдовме со шахта, а во Македонија се враќаме со оваа прекрасна награда. Мислам дека ова е навистина добра зделка! Од неизвесноста дали воопшто ќе успееме да го снимиме филмот до оваа вечер, кога стоиме тука, во Токио – навистина поминавме долг пат. Голема благодарност до сите што веруваа во нас и нè поддржуваа на тој пат. Галина Тонева, Ју-Фаи Суен, Светлана Левичева… еве нè тука. Благодарност до Меѓународниот филмски фестивал во Токио, кој веруваше во нашиот филм и до жирито што му ја додели оваа прекрасна награда. Аригато гозаимас!“,
изјави Ќортошев.
Годинава на Меѓународниот филмски фестивал во Токио (TIFF) пристигнале 1 892 филма од 112 земји и региони. По ригорозен процес на селекција, во натпреварувачката програма се избрани 15 филма. Жирито на натпреварувачката програма, предводено од австралискиот режисер Ролф де Ер, го сочинуваа филмски професионалци од Австралија, САД, Јужна Кореја, Јапонија и Франција.
„Сестра, брат и шахта“ е чудна комедија за оние што имаат и оние што немаат – во исто време лута сатира и суптилна поема за брат и сестра кои живеат на маргините на општеството. Филм за антихерои кој – во стил на Милчо Манчевски – отфрла секаква жанровска класификација, мамејќи и солзи и смеа. Иако се случува во денешна Македонија, филмот содржи универзално размислување за тоа како луѓето живеат и се поврзуваат во современиот свет.
Ова е негов деветти долгометражен игран филм. Во 2026 година тој го реализира и долгометражниот документарен филм „Добри луѓе“ за трагедијата во Кочани, со што во иста година претстави два филма пред меѓународната публика.
Главните улоги во „Сестра, брат и шахта“ ги играат Сара Климоска, Филип Трајковиќ, Соња Михајлова, Петар Мирчевски, Јордан Симонов, Дејан Лилиќ, Јасмина Василева, Стефан Николовски, како и Ана Костовска, Иван Ѓошевски, Виктор Арсов, Марина Поп Панкова, Александар Степанулески и Марин Гавриловски.
Дејвид Манс од Велика Британија е дизајнер на продукција. Директор на фотографија е Стефано Фаливене од Италија. Кастинг директорка е Милка Анчевска, костимите се на Жаклина Крстевска, а шминката на Бистра Кечиџиева од Бугарија. Продуцент на филмот е Јане Ќортошев.
Филмот се снимаше со меѓународна екипа на локации низ и околу Скопје. Копродуценти се „Гала филм“ од Бугарија, „Сенс продакшн“ од Србија, „Амаркорд продакшн“ и „Аугустус колор“ од Италија, „Беркли медиа груп“ од Англија и „Тирана филм институт“ од Албанија.