Како што анализира Си-ен-ен, изборите не се однесуваат само на тоа дали Нетанјаху ќе остане на власт, туку и на прашањата за безбедноста, одговорноста за пропустите пред нападот од 7 октомври, задолжителната воена служба и растечките трошоци за живот
Бенјамин Нетанјаху, кој е на чело на израелската влада во повеќе мандати, се соочува со предизвик од опозициските партии предводени од Гади Ајзенкот, поранешен началник на Генералштабот на израелската армија. Анкетите укажуваат на тесна трка меѓу двата политички блока, без јасни изгледи некој од нив самостојно да обезбеди мнозинство во Кнесетот, кој има 120 пратенички места
Израел денеска одржува парламентарни избори, први по нападот на Хамас на 7 октомври 2023 година и војните што следуваа во Газа, Либан и Иран. Гласањето се смета за важен тест за премиерот Бенјамин Нетанјаху, но и за насоката во која ќе се движи земјата во следните години.
Како што анализира Си-ен-ен, изборите не се однесуваат само на тоа дали Нетанјаху ќе остане на власт, туку и на прашањата за безбедноста, одговорноста за пропустите пред нападот од 7 октомври, задолжителната воена служба и растечките трошоци за живот.
Нетанјаху, кој е на чело на израелската влада во повеќе мандати, се соочува со предизвик од опозициските партии предводени од Гади Ајзенкот, поранешен началник на Генералштабот на израелската армија. Анкетите укажуваат на тесна трка меѓу двата политички блока, без јасни изгледи некој од нив самостојно да обезбеди мнозинство во Кнесетот, кој има 120 пратенички места.
За формирање влада се потребни најмалку 61 пратеник, поради што резултатот може да доведе до долги коалициски преговори, па дури и до нова политичка криза.
Одговорноста за 7 октомври и безбедноста
Една од главните теми во кампањата е нападот на Хамас од 7 октомври 2023 година, во кој загинаа повеќе од 1 200 луѓе во Израел, а 251 лице беше земено како заложник. Противниците на Нетанјаху бараат тој да преземе лична одговорност за безбедносните пропусти и се залагаат за независна истрага.
Истовремено, продолжените конфликти и потребата од воен персонал ја отворија дебатата за задолжителната воена служба. Ултраортодоксните Евреи со години имаат широки ослободувања од служење војска, а прашањето за нивниот придонес во одбраната стана една од важните теми во изборната кампања.
Економијата и иднината на палестинското прашање
Покрај безбедноста, значаен фактор за гласачите се и трошоците за живот. Дел од граѓаните се загрижени за цените и домувањето, додека прашањата за војната и односите со Палестинците остануваат во центарот на политичките поделби.
Владата на Нетанјаху, во која значајна улога имаат десничарските и ултраортодоксните партии, ја поддржува политиката на проширување на израелските населби на Западниот Брег. Неговите најостри десничарски партнери се против формирање палестинска држава.
И евентуална опозициска влада не би значела целосен пресврт во однос на палестинското прашање, бидејќи и дел од главните противници на Нетанјаху се против палестинска државност. Сепак, промената на владата би можела да донесе поинаков пристап кон насилството на доселениците и кон американските и регионалните иницијативи за Газа.
Изборниот резултат ќе зависи и од излезеноста, како и од тоа кои помали партии ќе го преминат изборниот праг од 3,25 проценти. Токму нивните пратенички места би можеле да бидат пресудни за формирањето на следната израелска влада.