Наместо извинување, ќе се обратиме до FARA и членови на Конгресот на САД што вршат надзор. Прашањата се прости. Дали лобирањето е правилно пријавено кога текстот е агенда на влада? Дали регистрантот проверил кој му е клиент? Кои контакти се воделе околу посетата во септември? Нема да нè замолчат со опомена, реагираат од СДСМ
„АТС груп“ од Скопје бара извинување од СДСМ во однос на обвинувањата изнесени на прес-конференцијата на која од партијата посочија дека фирмата ѝ плаќа околу 130 000 долари месечно на американската лобистичка компанија. Од СДСМ соопштија дека адвокатот Божидар Милошевиќ, во име на Шефшет Демировски и „АТС Груп“ ДООЕЛ Скопје, им доставил барање за јавно извинување и повлекување на изјави, со рок и со закана за тужба.
„Писмото не ги негира фактите што ги рековме. Гo менува контекстот. Ние не рековме дека ’АТС Груп’ се занимава со трговија со кокаин, се занимава со оружје. Рековме што стои во американскиот регистар и што објави БИРН. FARA 6170: Mercury ја плаќа АТС 130.000 долари месечно. Околу 1,56 милиони годишно. На 2 април 2026 истата куќа предава материјал ’Стратешко партнерство САД–Северна Македонија’. Во текстот стои пакет влада со влада. Име на премиерот Христијан Мицкоски. БИРН објави Демировски е уапсен во Белград во 2019 под сомнение за поткуп околу податоци за муниција од ’Први партизан’. Во 2022 предметот завршил со опортунитет. Уплата од 250.000 евра. Уплатувач: Александар Милојевиќ – Аца Цвеќар (стои во БИРН). Подоцна е обвинет во група за шверц на кокаин од Јужна Америка. Во предметот има српски и црногорски полицајци и припадник на БИА. Демировски во тој предмет за кокаин не е осуден. Тоа го рековме. Тоа го повторуваме. Што писмото не кажува: дека луѓето што ја платиле неговата слобода не се во тоа. Тие се уапсени. Со имиња. Со канал. Плаќањето на опортунитетот е доказ дека предметот за мито и корупција завршил со пари, не со јавна пресуда за невиност. На 27 март 2025 Муцунски и Мисајловски стојат кај потписот АТС–МКЕ. Тоа е јавен запис. Затоа бараат извинување. Не затоа што регистарот лаже. Затоа што хартијата боли“,
се наведува во објаснувањето од СДСМ.
Од партијата реагираат дека заканите за тужба се неосновани и оти немаат намера да ги повлечат изјавите.
„Наместо извинување, ќе се обратиме до FARA и членови на Конгресот на САД што вршат надзор. Прашањата се прости. Дали лобирањето е правилно пријавено кога текстот е агенда на влада? Дали регистрантот проверил кој му е клиент? Кои контакти се воделе околу посетата во септември? Нема да нè замолчат со опомена. Хартијата е јавна. БИРН е јавен. Бандата сака тишина. СДСМ сака вистина и правда“,
додаваат од СДСМ.
На 24 септември, СДСМ на прес-конференција посочи дека фирмата „АТС груп“ од Скопје, чија дејност е производство на муниција, шлемови и балистичка опрема, ѝ плаќа околу 130 000 долари месечно на американската лобистичка компанија „Mercury Public Affairs“ за промовирање на теми кои се претставуваат како стратешки државни приоритети на Македонија во САД.