Додека еден од обвинителите ги изнесуваше доказите по број и кратко објаснувајќи на кои околности се однесуваат, обвинетиот ексвицепремиер со лаптоп пред себе го следеше набројувањето на доказите. Реагираше на изведувањето на еден од нив, кој се однесуваше на одлуките и заклучоците донесени на седницата на Владата со која претседавал, а на која бил дополнет дневниот ред со четири нови точки
Доказите се однесуваа на тековната состојба на Лотарија за 2017, 2019 и 2024 година, договорот од 2013 година меѓу „Државна лотарија“ и „Казинос Австрија’ за формирање друштво за организирање електронски игри на среќа, потоа реакцијата на австриската компанија до Владата дека само ова друштво може да приредува ваков тип игри на среќа
Со изведување на материјалните докази на Обвинителството денеска во Основниот кривичен суд Скопје продолжи судскиот процес за предметот „Државна лотарија“, во кој првообвинети се ексдиректор на Лотарија, Перпарим Бајрами и поранешниот прв вицепремиер Артан Груби.
Тие и останатите шестмина обвинети, поранешни членови на Надзорниот одбор на државната компанија, се товарат за злоупотреба на службената положба и овластување во врска со набавка на видеолотариски терминали за приредување електронски игри на среќа.
Застапниците на обвинението ги читаа доказите кои се повеќе од 200 на број.
Додека еден од обвинителите ги изнесуваше доказите по број и кратко објаснувајќи на кои околности се однесуваат, обвинетиот ексвицепремиер со лаптоп пред себе го следеше набројувањето на доказите. Реагираше на изведувањето на еден од нив, кој се однесуваше на одлуките и заклучоците донесени на седницата на Владата со која претседавал, а на која бил дополнет дневниот ред со четири нови точки.
Тој се осврна на начинот на кој биле донесени одлуките, но од страна на судијката Билјана Шуплиновска-Јовевски мu беше кажано дека тој и сите обвинети ќе имаат можност да ги изнесат своите забелешки и теории на случајот во натамошниот тек на постапката.
Инаку, доказите се однесуваа на тековната состојба на Лотарија за 2017, 2019 и 2024 година, договорот од 2013 година меѓу „Државна лотарија“ и „Казинос Австрија“ за формирање друштво за организирање електронски игри на среќа, потоа реакцијата на австриската компанија до Владата дека само ова друштво може да приредува ваков тип игри на среќа.
Во корпусот докази од кои дел се групирани во контекст на околностите на кои се однесуваат, обвинителството се осврнува на постапките од анализите за набавка на видеотерминалите, одлуките и заклучоците на владата како дел од собранието на акционери во „Државна лотарија“, записници од одлучувањето на Надзорниот одбор на компанијата, како и самата постапка за спроведување на јавната набавка, означена како голема зделка.
Инаку, пред почетокот на изведувањето на доказите, бранителот на обвинетиот Бојан Јанев, адвокатот Јордан Апостолски, побара одложување на рочиштето бидејќи, како што кажа, поради кусите рокови им е потребно повеќе време да ги анализираат доказите на Обвинителството.
Во образложението се повика на европската конвенција за човекови права, но со неговите наводи не се согласи Обвинителството, а предлогот беше одбиен и од судијката. Според неа, од почетокот на судењето поминал повеќе од еден месец и одбраната имала доволно време да се запознае со доказите. Таа укажа и дека одбраната во текот на главната расправа ќе може да се запознае и да се произнесе по доказите, а ќе дозволи и завршни зборови.
Во изјава за медиумите на паузата на денешното рочиште, Апостолски рече дека изведените докази ја засилиле нивната теза дека обвинението е слабо, нејасно и контрадикторно.
„Од самите докази произлегува дека обвинетите не само што не ги сториле делата, туку постапувале по инструкции од Владата и го штителе државниот интерес како членови на Надзорниот одбор”,
рече бранителот на обвинетиот Бојан Јанев.
Тој додаде оти е нејасно зошто, како што кажа, Обвинителството го штити монополот што тогаш ги имала „Казинос Австрија“, а не и правото на „Државна лотарија“ самостојно да приредува електронски игри на среќа. На новинарска забелешка дека според Обвинителството, тоа не го дозволува законот, Апостолски рече дека тие ќе докажат оти тоа не е точно.
„Според нашата теза и по законот во нашата теорија на случајот на случајот, ќе видите дека тоа не е така и дека ‘Државна лотарија’ можела и самостојно и со други друштва со ограничена одговрност да приредува игри на среќа”,
изјави адвокатот.
Обвинението, кое го застапуваат јавните обвинители Даниел Коцев и Александар Давчевски, се однесува на дејства преземени во текот на 2023 и 2024 година, со кои обвинетите ги пречекориле границите на своите службени овластувања, иако знаеле дека АД „Државна лотарија“ нема право самостојно да приредува електронски игри на среќа на видеолотариски терминали.
Ова право уште во 2013 година било вложено како непаричен влог од 6,2 милиони евра во основањето на заедничката компанија „Државна видеолотарија на Република Македонија – КАСИНОС АУСТРИА“, каде АД „Државна лотарија“ поседува 51 отсто од уделот.
Инаку, во текот на истрагата обвинетите се товареа за кривичното дело проневера во службата, за кое, според членот 354 од Кривичниот законик, е предвидена повисока казна, но со поднесувањето на обвинителниот предлог, обвинителите од ОЈО Скопје направија преквалификација на делото во злоупотреба на службената положба и овластување.