Американскиот претседател Доналд Трамп го оцени како „непријателски чин“ предлогот Канада да стане придружна членка на Европската Унија, посочувајќи дека доколку тоа се случи, САД би можеле да воведат многу високи царини или целосно да ја прекинат трговијата со Европа
Предлогот на претседателката на Европската комисија, Урсула фон дер Лајен, Канада да стане придружна членка на Европската Унија не е насочен против Соединетите Американски Држави (САД), се вели во денешното соопштение на Европската комисија.
Ваквиот развој на настаните следува откако американскиот претседател Доналд Трамп се закани со воведување високи царини и прекин на трговските односи со Европа.
„Како што јасно истакна нашата претседателка вчера, предложеното зајакнување на партнерството со Канада не е насочено против никого, туку е за нашата заедничка сила“,
изјави портпаролот на Европската комисија за трговија, Олоф Гил.
Американскиот претседател Доналд Трамп го оцени како „непријателски чин“ предлогот Канада да стане придружна членка на Европската Унија, посочувајќи дека доколку тоа се случи, САД би можеле да воведат многу високи царини или целосно да ја прекинат трговијата со Европа.
Фон дер Лајен ја изнесе идејата за придружно членство на Канада во ЕУ во говорот пред Европскиот парламент во Стразбур, на кој присуствуваше и канадскиот премиер Марк Карни.
Таа предложи продлабочување на соработката меѓу ЕУ и Канада во повеќе области, вклучително и критичните минерали, вештачката интелигенција, технологијата, одбраната и Арктикот.
„Би сакала да работам со вас на отворање на вратата за Канада да биде првата придружна членка на ЕУ“,
му порача Фон дер Лајен на Карни.
Сепак, како што пишуваат американските медиуми, не е јасно што точно би подразбирал статусот на придружна членка, бидејќи таква форма на членство моментално не постои во правото на ЕУ.
Предлогот за создавање нов статус, кој би бил под полноправното членство, претходно годинава беше споменат и од германскиот канцелар Фридрих Мерц во контекст на Украина.
Според правилата на ЕУ, земјите членки треба да одобрат каква било форма на партнерство со трета земја. Франција изрази поддршка за продлабочување на врските со Канада, но најави дека предлогот ќе биде разгледан пред да заземе конечен став.
ЕУ и Канада веќе имаат значителна економска и политичка соработка. Договорот за слободна трговија ЦЕТА, со кој беа укинати речиси сите царини, придонесе за зголемување на трговијата со стоки и услуги за повеќе од 80 отсто од 2016 година.
Канада годинава стана и првата земја надвор од ЕУ што се приклучи кон една од клучните европски програми за одбранбени заеми.