Тој додава дека за албанскиот народ, тие се и остануваат ослободители на Косово. Војната на ОВК, жртвата и несебичноста на оние што ја воделе и биле дел од неа, Гаши смета дека се самиот пат што довел до слободата на Косово и до нова ера на мир и стабилност во регионот
Ниту една пресуда не може да го негира фактот дека Хашим Тачи, Јакуп Красниќи, Кадри Весели и Реџеп Селими припаѓаат на славно поглавје во историјата на Косово. Денешната пресуда е од прв степен, додека битката за правда продолжува. Вака претседателот на македонското Собрание, Африм Гаши, коментира по денешната пресуда на хашкиот суд со која водачите на поранешната ОВК, Хашим Тачи, Кадри Весељи, Реџеп Сељими и Јакуп Красниќи добија долги затворски казни за извршени воени злосторства во текот на косовската војна за независност.
„Во време кога слободата на Косово и мирот и стабилноста на регионот сè уште беа идеал за кој требаше да се бориме, тие имаа храброст да се ангажираат и да ја преземат врз себе историската одговорност да му донесат слобода на својот народ“,
пишува Гаши во објава на неговиот фејсбук-профил.
Тој додава дека за албанскиот народ, тие се и остануваат ослободители на Косово. Војната на ОВК, жртвата и несебичноста на оние што ја воделе и биле дел од неа, Гаши смета дека се самиот пат што довел до слободата на Косово и до нова ера на мир и стабилност во регионот.
„Затоа, денес е денот да застанеме заедно, со достоинство и смиреност, и да докажеме дека нашите умови и срца се блиску до ослободителите и нивните семејства. Затоа што слободно Косово беше најтешката битка и тие ја добија. Бидејќи слободно Косово е сведоштво на таа генерација што се осмели да сонува за слобода, а воедно и утеха што треба да нè држи силни пред денешната одлука и другите предизвици“,
додава Гаши.
Освен Гаши, денеска и неговата партија Влен, која е дел од Владата, ја оцени за неправедна и неприфатлива пресудата на Специјализираниот совет на Косово во Хаг против четворицата ексводачи на ОВК. Според Влен, казните што денеска им беа изречени на Хашим Тачи, Јакуп Красниќи, Кадри Весели, и Реџеп Селими – се високи и неприфатливи.
Претходно денеска и лидерот на опозициската ДУИ, Али Ахмети, ја квалификува како неправедна и длабоко разочарувачка пресудата против поранешните водачи на ОВК. Повика на воздржаност и единство во овие, како што ги нарече, тешки моменти и порача дека со верба во правдата, битката ќе продолжи со жалбената постапка.
Специјализираниот совет на Хаг ги осуди на повеќегодишни затворски казни поранешните водачи на Ослободителната војска на Косово (ОВК) – Хашим Тачи, Јакуп Красниќи, Реџеп Селими и Кадри Весели, прогласувајќи ги за виновни за воени злосторства извршени за време на војната во Косово. Хашим Тачи и Јакуп Красниќи добија затворски казни од по 25 години, Кадри Весели е осуден на 18 години затвор, а Реџеп Селими доби казна затвор од 13 години.