Од денеска претпладне е објавена и петиција од страна на „Шанса за Центар“, на која граѓаните ќе можат да ја дадат својата поддршка за повлекување на нацрт-ДУП за подрачјето „Барутана“ на Водно
Советничката од „Шанса за Центар“, Јана Белчева, укажа дека нацрт-ДУП не само што е еколошки и безбедносно спорен, туку тој, како што наведе во своето прашање до Ѓорѓиевски, е неусогласен со Генералниот урбанистички план (ГУП), што во прашање ја доведува неговата легалност. Сепак, рече таа, надлежната Комисија на Град Скопје, лани во октомври дала позитивно мислење за нацрт-ДУП за „Барутана“
Актуелниот градоначалник, според неговиот одговор, изрази подготвеност да разговара со надлежните служби во Градот за да се испита дали постои можноста за повлекување или дополнително постапување по нацрт-ДУП
Советничката во Советот на Град Скопје од редовите на иницијавата „Шанса за центар“, Јана Белчева, го повика градоначалникот на Скопје, Орце Ѓорѓиевски, да иницира преиспитување и повлекување на позитивното мислење од надлежната комисија на Градот за нацрт-деталниот урбанистички план (ДУП) Ј05 за местото познато како „Барутана“ на падините на Водно.
Белчева повикот до Ѓорѓиевски го упати на денешната 16. седница на Советот на Град, на која на дневен ред беа советнички прашања, посочуваќи дека со овој ДУП се предвидува нова бетонизација на Водно, каде треба да никнат десетици нови објекти. Ова, како што кажа советничката од „Шанса за Центар“, ќе има големи последици врз квалитетот на живот, но и безбедноста на жителите на Општина Центар.
Од денеска претпладне е објавена и петиција од страна на „Шанса за Центар“, на која граѓаните ќе можат да ја дадат својата поддршка за повлекување на нацрт-ДУП за подрачјето „Барутана“ на Водно.
„Се работи за нова бетонизација на Водно и сеча на шумата садена од претходните генерации за да нè штити сите нас, и за да го штити градот од поројни поплави, ерозија, лизгање на земјиштето, загадувањето на воздухот! Се предвидува изградба на десетици нови објекти на стрмниот пошумен дел од планинскиот опфат кој директно влијае на квалитетот на животот, но најмногу влијае на безбедноста на жителите на Центар“,
кажа таа од говорницата.
Но, овие безбедносни предивизици од еколошки аспект не се единствените поради кои овој ДУП, кој сè уште не е донесен, е проблематичен. Како што наведе Белчева, под прашање е и неговата легалноист, бидејќи не е усогласен со актуелниот Генерален урбанистички план (ГУП)
Дека параметрите се надминати, според неа, било потврдено и од изработувачот на вој нацрт-ДУП на презенттација во Општина Центар, а истото било кажано и од стручните служби на оваа скопска Општина.
„Параметрите се надминати со постоечките градби, а не, пак, со нови десетици градби сега“,
додаде Белчева.
Таа посочи дека одговорен за почитувањето на планираното во ГУП е Градот, но стручната комисија во конкрениот случај не утврдила неусогласеност, и на 15 октомври минатата година дала позитивно мислење и со тоа трасирала патот за, како што кажа Белчева, вој опасен план за Водно.
Во тој контекст, таа посочи дека нема да ги наведе со име и презиме седумте члена на Комисијата на Град Скопје кои го дале позитивното мислење, но најави дека ако нацрт-ДУП за „Барутана“ не се повлече, нивните имиња ќе бидат јавно објавени.
Планот, рече таа, е опасен и затоа што нема позитивно мислење од Дирекцијата за заштита и спасување (ДЗС). Додаде дека е потребно да се дејствува одговорно, да се проценуваат ризиците и да се спречат катастрофи, наместо „да се криеме низ процедури или претходни мандати. Несреќите, посочи таа, не се случајни, а во таа насока ја спомена трагедијата во Кочани, каде што лани во пожар во т.н. кабаре „Пулс“ загинаа 63 лица, а повеќе од 200 беа повредени.
„Кочани е доказ како премолчувањето, недозволеното толерирање на опасностите и немањето свесност за заканите по животот на луѓето, недостатокот на интегритет на потписниците, како и корупцијата доведоа до најголемата несреќа во земјава“,
рече советничката од „Шанса за Центар“.
Нејзиното прашање беше и порака до актуелниот градоначалник, Орце Ѓорѓиевски.
„Потпишаното позитивно мислење од градот мора да се преиспита, како за Ј05, така и за секој нов план. Еве, прашувам и ве повикувам да иницирате повлекување и преиспитување на ова позитивно мислење?“,
рече Белчева.
Ѓорѓиевски реагираше уште додека Белчева го поставуваше прашањето, а во одговорот дополнително појасни оти побарал од советничката да спомене дека планот за „Барутана“ добил поддршка од Град Скопје, пред да бидат завршени локалните избори, лани, односно за време на предходната градската администрација.
Актуелниот градоначалник, според неговиот одговор, изрази подготвеност да разговара со надлежните служби во Градот за да се испита дали постои можноста за повлекување или дополнително постапување по нацрт-ДУП.
Генералниот став што го кажа скопскиот градоначалник од говорницата во Советот беше дека кога станува збор за Водно треба да се интервенира и оти е против што било да се гради падините на планината, освен инфраструктура, во смисла на видиковци, клупи итн.
„Така што ќе ја повикам Комисијата и ќе ги испитаме сите можности и правни леков коишто вие ги споменавте. Ако има потреба, еве ќе ве вклучиме и вас и ќе побарам поддршка и од ваша страна во тој дел. Инаку, генерално сум против градење на било што на Водно, и тоа нека биде јасно на цела јавност. Градење на било што на Водно, освен инфраструктура, не е добро. Можеби ние нема да ги почувстуваме последиците, како генерација, можеби нашите деца нема да ги почувстуваат последиците, но наши внуци и правнуци ќе ги почувстуваат последниците еден ден. Така што, категорично сум против било што, освен летниковец, клупа и катна инфраструктура да се гради на падините на Водно“,
кажа Ѓорѓиевски.
Инаку, градоначалникот не одговори непосредно на прашањата на Белчева и на другите нејзини колеги. Новиот концепт на седниците за советнички прашања на Град Скопје налага советниците коишто имаат што да го прашаат Ѓорѓевски, тоа да го сторат на почетокот на седницата, а потоа во вториот дел градоначалникот да им одговори.
Поради ова советниците во Град Скопје ја напуштија денешната седница, наведувајќи дека без можност за непосредна расправа и дополнителни прашања до градоначалникот, директорите на јавните претпријатија и установи и градската администрација се ограничува демократскиот надзор врз градската власт и ја намалува улогата на советниците во барањето одговорност за управувањето со средствата и ресурсите на скопјани.