Согласно Законот за трговија и Законот за заштита на потрошувачите, предвидени се глоби од 500 до 10 000 евра во зависност од големината на субјектот, а за целосно непочитување на одлуката предвидена е привремена забрана за вршење на дејност од 15 дена
Државниот пазарен инспекторат (ДПИ) ги започна теренските контроли за да утврди дали трговците се придржуваат до мерката на Владата за намалување на цените на училишниот прибор. Согласно владината одлука, трговците на големо се должни да ги намлат цените на училишниот прибор за најмалку 10, а трговците на мало за најмалку 15 проценти. Намалените цени треба да бидат јасно истакнати.
„Согласно одредбите на одлуката, највисоките цени на производите се утврдуваат на нивото на цените (со исклучок на цените на акциска продажба) кои се применувале на 1 јуни 2026 година во трговијата на големо, кои се намалуваат најмалку за 10 проценти, како и во трговијата на мало (специјализирани продавници за продажба на училишен прибор, продавници за спортска опрема кои продаваат ранци и ташни и трговци на мало кои во својот асортиман на производи продаваат и училишен прибор), кои цени се намалуваат најмалку за 15 проценти“,
појаснуваат од ДПИ.
За производите набавени по 1 јуни 2026 година, појаснуваат од Пазарниот инспекторат, највисоката цена ќе се утврдува според евидентираната набавна цена, но со задолжително намалување – во трговија на големо за најмалку 10 проценти, а за трговија на мало за најмалку 15 проценти.
„Тимови на ДПИ во наредниот период ќе ги контролираат правните субјекти на целата територија на државата и ќе постапуваат согласно Законот за трговија и Законот за заштита на потрошувачите, каде глобите се движат од 500 до 10 000 евра во зависност од големината на субјектот, а за целосно непочитување на одлуката предвидена е мерка – привремена забрана за вршење на дејност од 15 дена“,
велат од Државниот пазарен инспекторат.
Ги повикаа граѓаните да пријават неправилности или непочитување на одлуката на 191 или на www.dpi.gov.mk.
Мерката стапи во сила на 25 август, а ќе трае заклучно до 30 септември. Покрај намалените цени, трговците се должни на полиците со училишен прибор да го постават и натписот „помалку трошоци, повеќе за тебе“, како и да ја истакнат претходната продажна цена на која е утврдено намалувањето.