За учеството на вицепремиерот Сали на состанокот на „Коалицијата на подготвените“ вчера немаше официјално соопштение ниту од Владата ниту од Министерството за европски прашања, со кое тој раководи. За неговото партиципирање денеска потврдија од Владата откако прашавме дали Македонија имала претставник на состанокот
По повод 35-годишнината од независноста на Украина, вчера лидерите на „Коалицијата на подготвените“ одржаа состанок на кој разговараа за натамошната поддршка и помош на земјата која петта година ги трпи последиците од руската агресија. Десетина лидери присуствуваа лично во Киев, меѓу кои британскиот премиер Енди Барнам и претседателот на Европскиот совет, Антонио Кошта. Останатите, меѓу кои и германскиот канцелар Фридрих Мерц, учествуваа преку видеоконференциска врска.
Како претставник од земјава, на состанокот онлајн учествувал и првиот вицепремиер и министер за европски прашања Беким Сали.
Сепак, за неговото учество на овој состанок немаше официјално соопштение ниту од Владата ниту од Министерството за европски прашања, со кое тој раководи.
Дали отсуството на официјална објава за учеството на Сали има врска со отсуството на пратениците Албанци на вчерашната сесија во Собранието посветена на јубилејот на украинската независност и на активностите поврзани со Кримската платформа, може само да се претпоставува.
Влада: Сали ја потврди поддршката на Македонија за Украина
Учеството на Сали на вчерашниот состанок за Украина за „360 степени“ го потврдија од Владата откако денеска испративме прашања до прес-службата. Со оглед на тоа што земјава е дел од „Коалицијата на подготвените“ за Украина, а вчера изостана информација за македонско учество, прашавме дали Македонија имаше претставник, ако не – зошто, ако да – кој ја претставувал и какви пораки пренел.
Од Владата ни одговорија дека вицепремиерот Беким Сали учествувал на состанокот преку онлајн врска.
Во своето обраќање, како што велат од Владата, тој ја реафирмирал „јасната и принципиелна позиција на Северна Македонија во поддршката на Украина, нејзиниот суверенитет, независност и територијален интегритет, во согласност со меѓународното право и Повелбата на Обединетите нации“.
„Тој нагласи дека Северна Македонија останува посветен и кредибилен сојузник во рамките на НАТО и партнер на Украина, како и дека ќе продолжи да придонесува во заедничките напори за постигнување праведен, сеопфатен и одржлив мир“,
се вели во владиното соопштение.
На состанокот, Сали ја истакнал и важноста од обезбедување силни и веродостојни безбедносни гаранции за Украина, како основа за долгорочна стабилност и безбедност.
„На состанокот вицепремиерот Сали ја потенцира и стратешката важност на европската перспектива на Украина, нагласувајќи дека проширувањето на Европската Унија претставува геополитичка инвестиција во мирот, безбедноста и стабилноста на целиот европски континент“,
додаваат од Владата.
Инкау, Сали на 15 јули беше во посета на Киев, каде што учествуваше на Самитот Украина – Југоисточна Европа, кој се одржуваше по повод Денот на државноста на Украина.
Во меѓувреме, на 7 и на 8 август украинскиот претседател Володимир Зеленски беше во посета на Белград, каде, меѓу другото, даде изјава дека го поддржува територијалниот интегритет и суверенитет на Србија, што не им се допадна на косоварите и на тамошната власт. Како реакција, веќе утредента беше симнато големото знаме на Украина кое беше истакнато во центарот на Приштина. Од друга страна, пак, познати се тесните врски на владејачката партија на Албанците во земјава – Влен со премиерот на Косово, Албин Курти.
Организиран бојкот?
Изјавата на Зеленски за Косово и блиските релации на Влен со Курти најверојатно се причината и за отсуството на пратениците Албанци, членови на Интерпартиската парламентарна група за поддршка на Кримската платформа, од вчерашниот настан во македонскиот парламент.
Видливо беше отсуството и на собранискиот спикер Африм Гаши, кој воедно е и претседател на таа парламентарна група. Наместо него, воведно обраќање имаше потпретседателот на парламентот, Антонијо Молошоски.
Како што вчера објавивме, нема официјална потврда дека отсуството на дел од пратениците од партиите на Албанците било организиран бојкот.
Сепак, пратеникот Ријад Шаќири од Алијанса за Албанците потврди дека намерно не присуствувал, како реакција на изјавата на украинскиот претседател Зеленски за почитување на територијалниот интегритет на Србија. Најави дека нема да присуствува ниту на идни настани поврзани со Украина.
Инаку, парламентарната група за поддршка на Кримската платформа е формирана во октомври 2024 година токму по иницијатива на Гаши, а со цел да се изрази парламентарна поддршка за Украина и нејзиниот територијален интегритет.
Од ДУИ, како што вчера објавија дел од медиумите, навеле дека дел од пратениците се на годишен одмор, а дел не биле информирани за настанот. Потпретседателот на оваа партија и ексминистер за надворешни работи, Бујар Османи, на својот фејсбук-профил упати честитка до Украина за годишнината од независноста, споделувајќи фотографии од посета на Украина и средба со претседателот Зеленски.