Први случаи на западнонилска треска деновиве евидентирани во скопски Центар и Чаир
Вкупно 43 случаи на западнонилска треска се регистрирани досега во земјава – информира денеска на прес-конференција министерот за здравство Сашо Клековски. Од нив, вели министерот, 40 се дефинитивно потврдени, а три од случаите се потврдени со еден тест. Први случаи се евидентирани во скопските општини Центар и Чаир.
„Од последната прес-конференција досега се регистрирани два нови случаи во Центар, еден во Чаир и еден во Аеродром, на границата кон руралниот дел. Клиничката слика е стандардна, нема промени во тој дел“,
изјави Клековски на денешната прес-конференција.
Во рамки на контролата на птиците, информира министерот, лоцирана е прва мртва птица со западнонилска треска. Станува збор за гавран што бил пронајден во Скопје.
„Мртвите птици се собираат од страна на Агенцијата за храна и ветеринарство (АХВ), по што се прави натамошното лоцирање на ризикот од западнонилска треска“,
рече Клековски и им заблагодари на граѓаните кои пријавуваат случаи на мртви птици.
Пред денешната прес-конференција, Клековски рече дека имал состанок со градоначалниците од Скопје и Скопскиот Регион, за лоцирање на високоризичните зони за западнонилска треска. Целта на состанокот, вели Клековски, е да се лоцираат овие подрачја бидејќи комарците не познаваат граници на општините.
„Во некои општини, на пример во Сопиште, нема високоризични подрачја, а има случаи. Во Чучер Сандево нема високоризични подрачја, но има на границата со Бутел и се обидовме да ги лоцираме. Во моментов работиме со 34 ризични подрачја од кои 13 се високоризични. Тоа е видливо и на сателитски снимки“,
изјави министерот.
Постојат два критериуми за ризичност на одредена локација и тоа – застојаност на водата и високо ниво на органска материја. Во основа, вели Клековски, водата треба да е застојана и да има отпад во неа. Примерите на високоризични локации се каналите за наводнување во Скопско Поле или „мртви“ делови од реките.
„Серава е дел од проблемот во Арачиново и Бутел, каналите Јурумлери, Стајковци и Сингелиќ во Гази Баба, главниот канал во Илинден на Скопско Поле, каналите во Драчево, каналите Батинци, Студеничани. Она што го лоциравме се уште неколку видови локации со висок ризик што претходно не биле земени предвид, а тоа се септичките јами. Улиците и населените места со голем број на септички јами влегуваат во висок ризик. Потоа гробишта – заради застојаната вода во вазите и присуството на органски материи во нив и третата група се отпади за стари гуми и генерално старите гуми. Ако не се соодветно чувани, се идеални престојувалишта за комарците“,
изјави министерот на денешната прес-конференција.
Многу поголем дел, вели Клековски, се малите или невидливи работи како расипани хидранти, саксии со цвеќе што се чуваат надвор, стари буриња со дождовница и генерално застојана вода. Одреден ризик може да претставуваат и скршените јавни чешми, но и полевањето на парковите, доколку не се спроведува правилно.
Клековски уверува дека прскањето против комарците се вршат со средства кои се препорачани од Светската здравствена организација (СЗО) и не се опасни по здравјето на луѓето.