Оттаму велат дека оваа влада го користи Охридскиот договор за финансирање на политичките и идеолошките приоритети на друга заедница, додека на Албанците им се укинуваат механизмите за застапеност, им се одзема јазикот од институциите, се отстрануваат од раководните позиции и се заменуваат во државната администрација
Според партијата, Охридскиот договор не смее да се претвори во инструмент за унапредување на „српскиот свет“, додека на Албанците секојдневно им се одзема по едно право
Од опозициската Демократската унија за интеграција (ДУИ) денеска излегоа со обвинување дека Владата доделила околу 90 отсто од средствата од програмата за спроведување на Охридскиот рамковен договор на организации од српската заедница.
Оттаму велат дека оваа влада го користи Охридскиот договор за финансирање на политичките и идеолошките приоритети на друга заедница, додека на Албанците им се укинуваат механизмите за застапеност, им се одзема јазикот од институциите, се отстрануваат од раководните позиции и се заменуваат во државната администрација.
„Кога приближно 90 отсто од една програма завршуваат во една насока, станува збор за однапред осмислена владина политика“,
се вели во партиското соопштение.
Според ДУИ, ваквата распределба на средствата е особено загрижувачка во време на политичко, институционално, културно и медиумско влијание на, ако што велат, таканаречениот проект „српски свет“ во државата.
„Институциите постепено се ставаат во служба на агенда што ја оддалечува државата од нејзиниот мултиетнички карактер, од духот на Охридскиот договор и од евроатлантската ориентација“,
додаваат оттаму.
Од партијата го повикаа коалицискиот партнер во Владата, Влен, да одговори што добиле Албанците од нивното претставување, кога дури и средствата од Охридскиот договор речиси целосно им се доделуваат на други.
„Влен не е само нем набљудувач на деградацијата на Албанците, туку е активен дел од механизмот што ја спроведува“,
велат од партијата.
Бараат итно објавување на целосната листа на корисници, износите доделени за секој проект, составот на комисијата за евалуација, доделените бодови и записникот од процесот на одлучување.
Според партијата, случајот треба да биде институционално и политички истражен.
„Охридскиот договор не смее да се претвори во инструмент за унапредување на ‘српскиот свет‘, додека на Албанците секојдневно им се одзема по едно право“,
се вели во партиското соопштение.