Израелскиот премиер изрази скептицизам за дипломатско решение со Техеран и нагласи дека главната цел останува спречување на Иран да развие нуклеарно оружје
Израелскиот премиер Бенјамин Нетанјаху изјави дека евентуалното продолжување на судирот со Иран е одлука која зависи исклучиво од американскиот претседател Доналд Трамп. Во интервју за американската мрежа „Еј-Би-Си“, Нетанјаху кажа дека Соединетите Американски Држави остануваат главен стратешки партнер на Израел, но дека Трамп е единствениот кој ја креира и раководи американската стратегија.
Според Нетанјаху, на средбата во Вашингтон биле разгледани повеќе опции за завршување на судирот, кои вклучуваат продолжување на преговорите со Техеран, одржување на блокадата на Ормуската Теснина или покренување нова воена офанзива, но крајниот избор му е препуштен на Трамп.
Притоа, израелскиот премиер изрази сериозен сомнеж во подготвеноста на Иран за постигнување реален договор, оценувајќи дека иранските власти веројатно се обидуваат да купат време и покрај силниот дипломатски и економски притисок.
Тој потврди дека примарна цел на Израел и понатаму останува спречувањето на Иран да набави нуклеарно оружје, истакнувајќи дека тоа е цел која ја дели и со американскиот претседател. Во однос на Ормуската Теснина, израелскиот премиер верува дека нејзиното стратешко значење со текот на времето ќе се намалува благодарение на развојот на нови енергетски рути кои ќе водат до Црвеното Море, а потоа и до Средоземното Море.
