„Дополнително, жителите изразуваат сомнеж дека сопственикот на фармата има блиски односи со овластен инспектор од Општина Штип поради што бараат случајот да не остане во надлежност на локалните структури, туку постапката да ја води Државниот инспекторат за животна средина“, се вели во партиската реакција
Само неколку дена по случувањата во Гостивар, каде што граѓаните беа изложени на вода загадена со фекалии поради институционални пропусти, од партијата додаваат дека државата повторно добива предупредување за можен еколошки инцидент
Од опозициската партија Левица денеска информираат за случај во кој жители на селото Долни Балван во Општина Карбинци, поднеле пријава до Државниот инспекторат за животна средина (ДИЖС) поради сомнежи дека од сточарска фарма со години се испушта течен животински отпад во канал кој се влева во реката Брегалница.
До партијата, како што велат оттаму, се доставени фотографии и пријава од жители кои бараат итен вонреден инспекциски надзор од надлежни институции, земање мостри од водата и преземање мерки доколку се утврдат прекршувања.
„Според доказите што ги доставиле, шталата е изградена непосредно до каналот, а на фотографиите се гледа и лице кое физички го турка изметот кон водотекот. Во пријавата се наведува дека не станува збор за изолиран случај, туку за долгогодишна пракса на директно загадување на Брегалница“,
се вели во партиското соопштение.
Во пријавата, како што пренесуваат од партијата, се изразува и сомнеж за можни влијанија врз постапката на локално ниво поради што се бара случајот да го преземе Државниот инспекторат за животна средина.
„Дополнително, жителите изразуваат сомнеж дека сопственикот на фармата има блиски односи со овластен инспектор од Општина Штип поради што бараат случајот да не остане во надлежност на локалните структури, туку постапката да ја води Државниот инспекторат за животна средина“,
додаваат од Левица.
Оттаму посочија и дека само неколку дена по случувањата во Гостивар, каде граѓаните беа изложени на вода загадена со фекалии поради институционални пропусти, државата повторно добива предупредување за можен еколошки инцидент.
„Водите на Брегалница се користат за наводнување на земјоделските површини во целиот регион, а жителите предупредуваат дека во непосредна близина се наоѓаат и штипските бунари за водоснабдување. Токму затоа, институциите денес имаат можност да спречат нова катастрофа, наместо повторно да реагираат откако штетата веќе ќе биде направена“,
велат од партијата.
Од Левица бараат Државниот инспекторат за животна средина да испрати инспектор на терен, да изврши вонреден надзор, да земе примероци од водата и да ја утврди фактичката состојба.
„Доколку се потврдат наводите, да се преземат сите законски мерки, вклучително и поднесување кривична пријава. Истовремено, бараме јавноста да биде целосно информирана за текот и исходот на постапката“,
посочија од Левица.
Жителите на Долни Балван, според партијата, доставиле докази и пријава до надлежните органи, а сега очекуваат институционална реакција и транспарентно информирање за текот и исходот на постапката.
„Сега на ред се институциите да покажат дали законот важи подеднакво за сите или повторно ќе надвладее логиката на личните врски и заштитените поединци на штета на здравјето на граѓаните“,
се вели во партиското соопштение.