Се прави вообичаена процедура што многу пати во минатото се правела. Во август тие средства ќе бидат вратени кај М-НАВ, Лотарија и МЕПСО, вели Мицкоски
Средствата обезбедени преку краткорочна позајмица ќе бидат искористени за сервисирање на обврски кон кинеската банка поврзани со изградбата на автопатите, изјави премиерот Христијан Мицкоски, на новинарско прашање за заемот во вредност од седум милиони евра од Македонската Навигација (М-НАВ). Тој посочи дека не станува збор за заем од единствено од М-НАВ, туку од повеќе институции и според него станува збор за постапка што и претходно се применувала.
„Не се само од Македонската Навигација, таму имаме средства и од Лотарија, МЕПСО и сопствени средства на ЈПДП. Средствата ќе бидат искористени за враќање на кредит кон кинеската банка за автопатите и истите тие средства во август ќе бидат вратени на компаниите. Се прави вообичаена процедура што многу пати во минатото се правела. Во август тие средства ќе бидат вратени и кај М-НАВ, и кај Лотарија и кај МЕПСО“ ,
кажа Мицкоски.
Одлуката за заем од седум милиони евра била донесена на владина седница на 14 јули.
Од СДСМ вчера преку соопштение реагираа оти ова е уште еден доказ дека во буџетот нема пари, а Мицкоски, како што рекоа, со денови бара алиби за предвремени избори.
„Резултати нема. Економијата е во колапс. Европскиот пат е целосно заглавен. Изолацијата е комплетна. Пари од претпристапните фондови на ЕУ нема и нема да има. Во буџетот наскоро нема да има ни за пензии. Затоа министерката за финансии призна дека немало ребаланс што беше најавен како инвестициски наместо кризен. Инвестициски во што? Во пензии. Кога државата почнува да позајмува од сопствените јавни претпријатија за да преживее од месец до месец, повеќе нема простор за пропаганда и спинови“,
се наведува во соопштението од СДСМ.