Со одлуката, на земјава ѝ се дава можност да ги реализира мерките што УНЕСКО со години ги посочува како неопходни за зачувување на статусот на Охридскиот Регион како светско културно и природно наследство
Охридскиот Регион засега нема да биде впишан како светско културно и историско наследство во опасност – одлучи Комитетот за светско наследство на УНЕСКО на годишната сесија одржана во градот Бусан во Јужна Кореја. Со одлуката на земјава ѝ се дава дополнителен рок од пет години за да ги спроведе препораките поврзани со заштитата на природното и културното наследство.
Со одлуката на земјава ѝ се дава можност да ги реализира мерките што УНЕСКО со години ги посочува како неопходни за зачувување на статусот на Охридскиот Регион како светско културно и природно наследство.
Препораките се однесуваат на мерки за зачувување на исклучителната универзална вредност на регионот, меѓу кои запирање на неконтролираната урбанизација и нелегалната градба, подобро урбанистичко планирање, заштита на природните вредности на Охридското Езеро, подобро управување со регионот, заштита на културното наследство, ограничување на притисокот од туризмот, изготвување целосна стратегија за управување со регионот со јасни цели, рокови, одговорни институции и механизми за следење на резултатите.
Во досегашните извештаи УНЕСКО повеќепати нагласуваше дека проблемот е кумулативниот ефект од урбанизацијата, инфраструктурните проекти и недоволната контрола, што може да ја наруши универзалната вредност поради која Охридскиот Регион беше впишан на листата во 1979/1980 година.