fbpx
Свет

(ВИДЕО) Шумски пожар од Толедо се шири кон Мадрид – наредена е итна евакуација

360степени | 22 јули, 2026 23:46

Првото предупредување е испратено околу 19 часот, откако пожарот од општината Алморокс во Толедо се доближил до границата со регионот Мадрид. Подоцна, ново предупредување било испратено и за жителите на Рибера дел Алберче, Ринкон дел Алберче и блискиот камп, повикувајќи ги да се засолнат во внатрешноста на Алдеа дел Фресно

Во гаснењето на пожарот се ангажирани 19 копнени и воздушни екипи, составени од пожарникари, шумски служби и други спасувачки тимови од регионите Мадрид и Кастиља-Ла Манча. Во акцијата се вклучила и Воената единица за вонредни ситуации, која воспоставила команден центар во близина на пожарот

Голем шумски пожар што вчера попладне избувна во шпанската покраина Толедо се прошири кон регионот Мадрид, поради што властите наредија итна евакуација на населението во најзагрозените подрачја.

Од пожарот во близина на Мадрид / Фото: Принтскрин

Регионалната агенција за безбедност и вонредни ситуации на Мадрид преку системот ES-Alert испрати итни известувања до граѓаните, со препорака за евакуација или останување во затворени простории во најзагрозените подрачја.

Првото предупредување е испратено околу 19 часот, откако пожарот од општината Алморокс во Толедо се доближил до границата со регионот Мадрид.

Евакуирана била населбата Ел Енсинар дел Алберче, со околу 1 200 жители, додека на жителите на Вила дел Прадо, општина со околу 7 700 жители, им било наредено да останат во своите домови.

Подоцна, ново предупредување било испратено и за жителите на Рибера дел Алберче, Ринкон дел Алберче и блискиот камп, повикувајќи ги да се засолнат во внатрешноста на Алдеа дел Фресно.

Поради густата концентрација на час, надлежните ги повикаа граѓаните да не ги отвораат вратите и прозорците, а на оние што ги напуштаат погодените области им е препорачана зголемена внимателност поради намалената видливост.

Владата на Мадрид го активираше второто оперативно ниво од Планот за заштита од шумски пожари, кое се прогласува кога огнената стихија претставува директна закана за населени места.

Со ова се овозможува евакуација или изолација на населението, ангажирање државни ресурси, вклучително и Воената единица за вонредни ситуации, како и активирање на системот за масовно предупредување на граѓаните.

Поради пожарот бил затворен автопатот N-403 кон Толедо, како и регионалниот пат М-507 во правец на Навалкарнер.

Во гаснењето на пожарот се ангажирани 19 копнени и воздушни екипи, составени од пожарникари, шумски служби и други спасувачки тимови од регионите Мадрид и Кастиља-Ла Манча. Во акцијата се вклучила и Воената единица за вонредни ситуации, која воспоставила команден центар во близина на пожарот.

Според информациите на локалните медиуми, пожарот првично претставувал закана само за околните населени места, но откако ја зафатил густата борова шума, огнот брзо се проширил кон крошните на дрвјата и се приближил до урбаните подрачја. Поради тоа биле преземени мерки за заштита и евакуација на населението.

Противпожарните служби од Мадрид и Кастиља-Ла Манча продолжуваат со координирана акција за локализирање на пожарот, кој се проширил на територијата на двете автономни заедници.

©2026 360 степени, Сите права се задржани