На Клиниката за неврохирургија за лекување е задржана пациентка со повреда на главата и фрактура на десната потколеница, а на Трауматологија е хоспитализиран пациент со скршеница на левата потколеница
Единаесет пациенти биле примени во Ургентниот хируршки центар по вчерашното невреме што го зафати Скопје. Тројца од пациентите имаат тешки повреди, а осуммина се со полесни.
Директорот на ТОАРИЛУЦ, Игор Мерџановски, во изјава за МИА вели дека една пациентка со повреда на главата и фрактура на десната потколеница е задржана на понатамошно лекување на Клиниката за неврохирургија.
На Клиниката за трауматологија е хоспитализиран и пациент со скршеница на левата потколеница, додека пациентка со скршеница на левиот рачен зглоб, по укажаната медицинска помош, е пуштена на домашно лекување.
Вчера д-р Анита Димоска, раководителка на Итната медицинска помош во Скопје за „360 степени“ рече дека откако почнало невремето добиле повеќе пријави за повредени граѓани на неколку локации низ градот.
Во Универзитетската клиника за хируршки болести „Свети Наум Охридски“, како што рече вчера директорот д-р Небојша Настов, имало шест лица што се повредени од невремето и дека тие се третираат амбулантски. Пациентите се со исеченици и набиеници, но се во стабилна состојба. Еден од пациентите бил повреден при пад на дрво и гранки, друг од лим што паднал од покрив, а трет од паднати ќерамиди.