Како што беше истакнато, финансиската помош ќе се искористи за набавка и дистрибуција на вода за пиење, пробиотици и други неопходни средства за загрозените граѓани
Советот на Општина Гостивар донесе одлука за доделување 600 000 денари на Општинската организација на Црвениот крст. Овие средства се наменети за поддршка на активностите за справување со епидемијата на територијата на општината.
Како што беше истакнато, финансиската помош ќе се искористи за набавка и дистрибуција на вода за пиење, пробиотици и други неопходни средства за загрозените граѓани.
За време на кусите дискусии околу новонастанатата ситуација по прогласувањето на епидемиската состојба, советниците беа децидни дека во овој период се потребни заедничко делување и солидарност, а не политички поделби.
Советниците ја поздравија одлуката за формирање Кризен штаб, од кого се очекува наскоро да одржи состанок и да предложи конкретни чекори и мерки за справување со состојбата.
Дел од советниците апелираа дека на граѓаните им се потребни одговори околу безбедноста на водата за пиење и официјалните резултати од анализите на гостиварскиот водовод.
Градоначалникот на Гостивар, Валбон Лимани, денеска кажа дека на телефонскиот број 071839300, граѓани кои немаат можност да излегуваат, ќе можат да се јават, а мобилните тимови ќе им доставуваат вода и други неопходни работи. Целта е, како што вели, да им се олесни секојдневното функционирање во овие денови.
Лимани рече дека локалната самоуправа е во постојана координација и соработка со надлежните институции со цел утврдување на вистината за случајот.
Градоначалникот информираше и дека директорката на Јавното претпријатие „Комуналец“ и дел од раководството на претпријатието се суспендирани од своите функции.
Од Министерството за внатрешни работи, пак информираа дека во полициска акција денеска е уапсена в.д. директорката на Јавното претпријатие „Комуналец“-Гостивар, Артана Асани. Покрај неа, во акцијата, која се спроведува врска со сомненијата за загадување на водата во гостиварскиот водовод, приведени се и шефот на гостиварски „Водовод и канализација“ и техничкиот директор на ЈП „Комуналец“-Гостивар.