Од Министерството за внатрешни работи информираат и оти претседателката на Комисијата за медицински канабис не спровела ниту една задолжителна инспекција кај правно лице во период од речиси две години
Надворешната канцеларија за криминалистички работи (НККР) Свети Николе поднесе кривична пријава против 39-годишната Д.П. од Скопје поради основано сомнение за сторено кривично дело несовесно работење во службата. Од Министерството за внатрешни работи велат оти таа ги прекршила своите овластувања во својство на претседател на Комисијата за оценување на условите за одгледување канабис за медицински цели при Министерството за здравство.
Во периодот од 18 ноември 2022 до 21 август 2024 година, таа постапила спротивно на Законот за контрола на опојни дроги и психотропни супстанции. Иако имала стриктна законска обврска да организира најмалку две теренски контроли, таа не спровела ниту една инспекција кај лиценцирано правно лице во Свети Николе.
„Од МВР наведуваат дека, и покрај известувањата доставени од правното лице во текот на 2022 и 2023 година, пријавената не презела законски пропишани контроли, со што му овозможила на правното лице да оствари вишок на производство од 56 килограми канабис“,
велат од МВР.
Неправилноста била откриена и констатирана со записник при контрола извршена неодамна, на 19 февруари 2025 година.