Пропустите кои со градежното вештачење се утврдени во објектот на „Пулс“, како што посочи професорот од Градежниот факултет, Горан Марковски, датираат од самата конструкција на градбата за нејзината првична намена, а се провлекуваат и преку нејзината понатамошна реконструкција. Објектот, додава Марковски, ваквите слабости си ги носел уште од моментот од кога започнал да функционира како ноќен клуб
Градежното вештачење покажа оти безбедноста на посетителите на „Пулс“ воопшто не била во интерес при реконструкцијата и пренамената на објектот за дискотеката – изјави судскиот вештак и професор на Градежниот факултет при УКИМ, Горан Марковски, на денешното судење за пожарот во Кочани.
Марковски вели дека не биле почитувани ниту стандардите, ниту регулативата, ниту процедурите.
„Градежното вештачење, за жал, покажа недвосмислено дека во случајот ‘Пулс’, системот, односно институциите и поединците целосно не функционирале. Не биле почитувани ниту стандардите, ниту регулативата, ниту процедурите. Оние процедури што треба да обезбедат почитување стандарди и регулативи. Или, едноставно, не било почитувано ништо. За сето ова да функционира е потребен систем што ќе функционира и гарантира почитување и спроведување на стандардите“,
изјави професорот Горан Марковски на денешната седница.
Посочи дека не смее и не може на објекти за различна намена да се користат исти материјали бидејќи ризиците од пожари се разликуваат од различните намени на користење на објектите. Вештачењето, додаде тој, покажува дека во објектот на „Пулс“ практично немало никаква заштита од пожари.
„Пожарот во ‘Пулс’ многу бргу доведе до уривање на дел од покривната конструкција, што покажува дека воопшто не се водело сметка. Да се коригирам, можеби за индустријата за која првично бил наменет објектот – да, но за дискотека – не. Второ, градбата треба да го спречи ширењето на пожарот и чадот во градбата и на соседните објекти. За жал, и тука имаме разочарувачко сознание. Градбата во случај на пожар треба да овозможи лицата неповредени да ја напуштат градбата, односно да овозможи нивно спасување. На крајот, градбата треба да биде така конструирана за да обезбеди заштита и лесен пристап на спасувачките тимови. Видовме дека и ова не е исполнето“,
додаде Марковски.
Ваквите пропусти, како што додава професорот од Градежниот факултет, се од самата конструкција на градбата за нејзината првична намена, а се провлекуваат и преку нејзината понатамошна реконструкција. Објектот, додава Марковски, ваквите слабости си ги носел уште од моментот од кога започнал да функционира како ноќен клуб.
Професорот, меѓу другото, појасни дека објектот е составен од два дела, и тоа еден со одобрение за градба од 1999 година, и втор, кој е дивоградба легализирана во 2011 за лесна индустрија и потоа пренамената. Тој потоа презентира хронологија на вршени градежни зафати и реконструкција во објектот, истакнувајќи дека ниедна фаза на градежни зафати на објектот во периодот 2012–2024 година не е проследена со проект, надзор или инспекциски записник.