„Со ваквата блокада не и се наштетува само на дијаспората, туку се доведува во прашање и исполнувањето на реформските обврски на државата и поради тоа Европската Унија повика на консензус и на навремено донесување на Изборниот законик“, велат од владејачката партија
Владејачката ВМРО-ДПМНЕ обвини дека опозициските СДСМ и Левица се во коалиција за заеднички да го блокираат донесувањето на новиот Изборен законик. Како што велат, таа коалиција нема државен и национален интерес, туку личен интерес на лидерите на двете партии.
„Така, коалицијата СДС-Левица заеднички го блокираат донесувањето на новиот Изборен законик, во кој се вметнати забелешките на ОБСЕ и ОДИХР, како и барањата на двете политички партии кои со месеци беа усогласувани на работните средби за овој закон. Венко Заев и СДС, од страв од длабок пораз, се спротивставуваат на решението македонската дијаспора да гласа во што поголем број. Предлогот на ВМРО-ДПМНЕ е дијаспората да може да го искористи своето право на глас по електронски пат или по пошта. Но, од СДС и Венко Заев ваквиот предлог беше одбиен, затоа што голем е стравот и паниката кај нив за тоа дека македонските граѓани кои ја напуштија државата во периодот на нивно владеење, кое не е така одамна, нема да ја поддржат нивната политика, а со тоа ќе доживеат уште поголем пораз на следните претседателски избори“,
велат од ВМРО-ДПМНЕ.
Во партијата сметаат дека и покрај тоа што биле прифатени предлозите на Левица во делот на финансирањето на изборните кампањи, сепак тие не го потпишуваат договорот што, како што велат од ВМРО-ДПМНЕ, бил граден со месеци во работната група меѓу сите политички партии.
„Целта им е да се претстават пред јавноста како партија со која нема преговори и која не прави компромиси. Жално е што на ваков начин, на штета на македонските граѓани кои од мака заминале од државата, се обидуваат да добијат политички поен повеќе. Со ваквата блокада не и се наштетува само на дијаспората, туку се доведува во прашање и исполнувањето на реформските обврски на државата и поради тоа Европската Унија повика на консензус и на навремено донесување на Изборниот законик“,
соопшти ВМРО-ДПМНЕ.
Од ВМРО-ДПМНЕ остануваат на ставот дека Изборниот законик треба да биде донесен со широк политички консензус и во интерес на државата, реформите и обезбедувањето можност македонската дијаспора по електронски пат да го оствари своето право на глас.