Атмосферата пред самиот натпревар беше, условно кажано, наелектризирана, откако светската фудбалска организација – ФИФА донесе одлука со која го поништи црвениот картон што напаѓачот на америнската репрезентација Фоларин Балогун го доби во осминафиналниот меч против селекцијата на Босна и Херцеговина
Капитенот на белгиската репрезентација, Јури Тилеманс, изјави дека контроверзијата околу супензијата на црвениот картон на Балогун придонела да се мотивира неговиот тим
Фудбалската репрезентација на Белгија со високи 4:1 го совлада тимот на Соединетите Американски Држави (САД), еден од кодомаќините на Светското фудбалско првенство, и обезбеди пласман во четвртфиналето на турнирот. Но, како што пишуваат медиумите, победата за Белгија е двојно послатка бидејќи освен што ќе се борат за влез во полуфиналето, ја надминаа, според нив, неправдата што ФИФА им ја нанела надвор од фудбалскиот терен.
Атмосферата пред самиот натпревар беше, условно кажано, наелектризирана, откако светската фудбалска организација – ФИФА донесе одлука со која го поништи црвениот картон што напаѓачот на американската репрезентација Фоларин Балогун го доби во осминафиналниот меч против селекцијата на Босна и Херцеговина.
Дополнителна контроверзија на одлуката на ФИФА ѝ даде изјавата на американскиот претседател Доналд Трамп, кој рече дека лично го замолил претседателот на ФИФА, Џани Инфантино, да го преиспита црвениот картон на Балогун, оти верува дека искучувањето на фудбалерот било неправедно.
Белгија беше огорчена од одлуката, а неа ја искоментира и европската фудбалска организација – УЕФА, оценувајќи ја како неразбирлива и неоправдана.
Но, се чини дека со убедливата победа синоќа, Белгија се реваншира. Веднаш по последниот свиреж на судијата, со кој беше означен крајот на мечот, белгискиот тим на своите официјални канали на социјалните мрежи објави фотографии од прославите на четирите гола со порака: „Поништете го ова“.
Overturn this. 🧏♂️ #USABEL pic.twitter.com/KcBAJp3Z7d
— Belgian Red Devils (@BelRedDevils) July 7, 2026
Капитенот на белгиската репрезентација, Јури Тилеманс, изјави дека контроверзијата околу супензијата на црвениот картон на Балогун придонела да се мотивира неговиот тим.
„Да бидеме искрени. Имавме состанок кога ја слушнавме веста. Си рековме дека треба да ‘зборуваме’ на теренот и тоа е она што го направивме денеска. Многу сум горд на тимот“,
рече тој.
Голманот на Белгија, Тибо Куртоа, рече дека нивната репрезентација во последните денови во САД се соочила со, како што кажа, недостиг на почит.
„Луѓето велеа дека лесно може да нè победат, но мислам дека денес докажавме оти навистина сме добар тим. Играме одличен фудбал“,
изјави Куртоа.
Белгискиот крилен играч Доди Лукебакио рече дека иако тимот бил свесен за инцидентот со Балогун, не дозволил да им го одвлече вниманието.
„Навистина не разбиравме зошто му беше дозволено да игра, бидејќи доби црвен картон, но не сакавме премногу да навлегуваме во тоа, сакавме да бидеме фокусирани и да ја играме нашата игра, и тоа е она што го направивме денес“,
кажа тој, пренесе „Гардијан“.
Страстите малку ги ублажи селекторот на белгискиот тим, Руди Гарсија, кој истакна дека она што на крајот било важно е да се држат и да го спроведат нивниот план на игра.
Прашан дали поништувањето на црвениот картон на Балогун ги мотивирало играчите, тој рече:
„Не, не беше потребно или неопходно… она што навистина ни беше важно е нашиот план на игра“,
изјави Гарсија.
Додаде и дека Балогун не е виновен за одлуката и оти разговарал со него по последниот свиреж на судијата.
„Тој дојде да разговара со мене, навистина ми се допаѓа тоа… Не е негова вина, тој не е виновен и тоа му го кажав“,
изјави Гарсија.
Белгија в петок ќе игра против Шпанија во битка за влез во полуфиналето на Светското првенство.