Според директорот на Дирекцијата за заштита и спасување (ДЗС), Стојанче Ангелов, пожарот над селото Белица сè уште е релативно мал, но огнот зафатил исклучително тешко достапно место, до кое може да се стигне само пеш и затоа во секој момент ќе бидат активирани два воздухоплови за гаснење пожари на Дирекцијата – „ертрактор“
Пожарот во Штип избувнал доцна попладнево меѓу населбите Баби и Дузлак, над филтер-станицата во градот, каде огнот зафатил борова шума. Според Ангелов, станува збор за сериозен пожар, поради што ТППЕ Штип е ангажирано со сите капацитети, а на помош се очекуваат и доброволни противпожарни друштва
Пожар попладнево избувна над селото Белица во општината Македонски Брод, на самата граница на ловиштето „Јасен“, соопшти директорот на Дирекцијата за заштита и спасување, Стојанче Ангелов.
Како што информира тој, кон пожарот се упатени екипи на Територијалната противпожарна единица (ТППЕ) Македонски Брод и од Јавното претпријатие за заштита на повеќенаменското подрачје „Јасен“.
Според Ангелов, пожарот сè уште е релативно мал, но огнот зафатил исклучително тешко достапно место, до кое може да се стигне само пеш, поради што во секој момент ќе бидат активирани два воздухоплови за гаснење пожари на Дирекцијата – „ертрактор“.
„Воедно, во секој момент ќе полетаат два ‘ертрактори’ на ДЗС“,
вели Ангелов.
Дополнително, директорот на ДЗС информира и дека доцна попладнево тежок пожар избувнал на територијата на општина Штип, меѓу населбите Баби и Дузлак, над филтер-станицата во градот, каде огнот зафатил борова шума.
Ангелов вели дека Територијалната противпожарна единица (ТППЕ) Штип дејствува со полн капацитет врз пожарот, а на помош се очекува да пристигнат и членови од неколку доброволни протипожарни друштва.
За пожарот кај селото Белица на територијата на Македонски Брод информираа и од Центарот за управување со кризи (ЦУК). Според дневниот пресек на состојбата со пожари, од вкупно 11, колку што ги имало до 18 часот на отворен простор, активен е само овој пожар, еден е ставен под контрола, додека девет се изгаснати. Во информациијата од ЦУК не е наведен пожарот во општина Штип.
Инаку, под контрола е ставен пожарот во Општина Брвеница, кај селото Милетино, каде што беше зафатена ниска вегетација.
Во текот на денот целосно се изгаснати девет пожари во општина Ѓорче Петров, кај селото Кучково, каде што горела деградирана ниска вегетација, додека во општина Велес е изгаснат пожарот кај селото Црквино.
Изгаснати се и пожарите кај селото Црвени Брегови во Општина Неготино, селото Стојаково во Општина Богданци и селото Добрејци во Општина Струмица, каде што била зафатена ниска, односно нискостеблеста вегетација.
ЦУК информира дека е локализиран и изгаснат пожарот кај манастирот „Св. Јоаким Осоговски“ во Општина Крива Паланка, како и пожарот кај селото Царевиќ во Општина Прилеп, каде горела ниска вегетација во шумски предел.
Изгаснати се и пожарите кај селото Нов Караорман во Општина Карбинци, каде што биле зафатени жито и деградирана ниска вегетација, како и кај селото Смојмирово во Општина Берово.
Од Центарот за управување со кризи посочуваат дека надлежните служби ја следат состојбата на терен и интервенираат на сите пријавени пожари.
Вчера на територијата на Штип имаше два пожари, еден кај тврдината Исар и друг кај штипската Млекара, а сериознi последици предизвика и огнетата стихија што зафати неколку населени места во општина Пробиштип, во кои изгоре и една куќа.
Директорот на ДЗС, Стојанче Ангелов, денеска во изјава за медиумите од Штип рече дека утврдува што го предизвикало пожарот на тврдината Исар, а се истражува и пожарот кај штипската Млекара, за кој постои сомнеж дека е подметнат.