На социјалните мрежи се споделува видео од пожарот селото Неокази и според објавата на патот Пробиштип-Штип има намалена видливост поради густиот чад
Три активни пожари на отворен простор се регистрирани на територијата на државата до 13 часот, информираат од Центарот за управување со кризи (ЦУК).
Според ЦУК, пожарникарите во моментов интервенираат во делови од општините Штип, Пробиштип и Чешиново-Облешево.
Во Општина Штип пожар е регистриран во централното градско подрачје, на местото викано Исар, каде што гори ниска вегетација. Од Дирекцијата за заштита и спасување (ДЗС) информираат дека „ертрактор“ веќе е полетан да интервенира на овој пожар.
На терен во населбата Исар се веќе противпожарни возила, пожарникари и доброволци од ДПД од Штип, како и населението и волонтери, каде со помош на цистерни со вода, но и лопати и вода од околните куќи, не дозволуваат пожарот да дојде до најблиските објекти.
Градоначалникот на Општина Штип, Иван Јорданов, вели дека за среќа нема повредени и нема зафатено куќи во населбата Исар, која е под тврдината Исар.
Активен пожар во кој гори ниска вегетација има кај селото Неокази во Општина Пробиштип. Од ДЗС велат дека пожарот во Пробиштипско започнал меѓу селата Бучиште, Неокази и Петршино.
„Пожарот во Бучиште е локализиран, но изгорена е една куќа, а еден дел од огнот се префрла накај селото Ратавица“,
велат од ДЗС.
На социјалните мрежи се споделува видео од пожарот селото Неокази и според објавата, на патот Пробиштип-Штип има намалена видливост поради густиот чад.
Пожарникарите интервенираат и во Општина Чешиново-Облешево, кај селото Новоселани, каде што исто така е зафатена ниска вегетација.