„Ги лансира новиот Максим Димитриевски и неговата екипа. Сега се претставуваат како опозиција, а по изборите ќе посакаат да станат дел од ‘тендер-коалицијата’. Така изгледа кога Мицкоски создава и финансира свои сателити“, се вели во соопштението од Бихаќска
Од Социјалдемократскиот сојуз на Македонија (СДСМ) сметаат дека новоформираната демократска платформа „Разговори за иднината во 12:05“ е „Проект ЗНАМ 2.0 – платформа за иднината на Мицкоски“.
Според партијата, промовирање на луѓе без јасна структура и порака не е случајност, туку смислено од премиерот и лидер на ВМРО-ДПМНЕ, Христијан Мицкоски.
Од СДСМ тврдат дека Мицкоски првично се обидел да ја провлече оваа платформа внатре во самата партија со цел да предизвика внатрешни поделби. Откако тој план пропаднал, како што велат оттаму, сега тоа го прави самостојно.
„Ги лансира новиот Максим Димитриевски и неговата екипа. Сега се претставуваат како опозиција, а по изборите ќе посакаат да станат дел од ‘тендер коалицијата’. Така изгледа кога Мицкоски создава и финансира свои сателити“,
се вели во партиското соопштение.
Од СДСМ го коментираат и начинот на кој се одржала дебатата на „Разговори за иднината во 12:05“, посочувајќи дека средбата зад затворени врати била искористена за прикривање на реалноста.
„Затоа и се одржуваат разговори под ‘Chatham House’ правила – сè можат да кажат, освен дека газдата е Мицкоски, а промоторот е Латас“,
обвинуваат од Бихаќска.
Партијата повлече паралела со движењето ЗНАМ на Максим Димитриевски тврдејќи дека тие прво ја предале сопствената партија, а потоа и своите гласачи, но порачуваат дека овој пат тоа нема да се случи.
„ЗНАМ 2.0 нема гласачи 2.0. Тоа е истиот народ што беше сведок на сè што направи Мицкоски“,
велат од СДСМ.
Во соопштението се додава и дека Мицкоски ги излажал сопствените гласачи за клучните прашања – името, Преспанскиот договор, повисоките плати, ЕУ и економијата, но наместо тоа испорачал „катастрофа во сè што се фати, ја уништи економијата и ја изолира земјата“.
Од партијата порачуваат дека е доста со сателити на Мицкоски и организирани криминални групи кои ги продаваат државните интереси заради лични амбиции и материјална корист.
Од СДСМ велат дека има еден фронт за вистина и правда и најавуваат брзо враќање на власта во рацете на граѓаните.
Реакцијата на СДСМ доаѓа откако денеска под името „Разговори за иднината во 12:05“ беше промовирана нова демократска платформа со цел подигнување на нивото на општествената дебата во земјава.
Првата сесија се одржа зад затворени врати, почитувајќи го традиционалното демократско начело „Chatham house rules“. На неа биле собрани учесници поделени во три неформални групи на општествени чинители: влијателни граѓански активисти кои никогаш не биле партиски членови, гласни актуелни опозициски вршители на јавни функции и истакнати припадници на различни генерации на СДСМ.
Учесниците на денешните разговори, како што се вели во соопштението, заеднички дефинирале неколку заклучоци за моменталната општествено-политичка состојба.