Милошоски смета дека на овој начин Филипче ја докажува и својата главна цел, а тоа, како што вели, е спротивставување на законите од Реформската агенда. Пратеникот од ВМРО-ДПМНЕ дополнително ја постави дилемата дали лидерот на СДСМ ги следи ставовите на Левица, од каде што претходно денеска, исто така, најавија дека ќе ги блокираат предложените измени на Изборниот законик
Преку најавата за блокада на Изборниот законик, Венко Филипче создава алиби за следниот изборен пораз или евентуално за бојкотирање на следните парламентарни избори, без разлика кога ќе се случат. Ова на прес-конференција денеска го изјави пратеникот на ВМРО-ДПМНЕ, Антонио Милошоски, коментирајќи ја најавата на лидерот на опозицискиот СДСМ дека партијата ќе го блокира предложениот Изборен законик и оцени дека содржи недемократски решенија кои создаваат простор за злоупотреба и контрола на изборниот процес.
Милошоски смета дека на овој начин Филипче ја докажува и својата главна цел, а тоа, како што вели, е спротивставување на законите од реформската агенда. Пратеникот од ВМРО-ДПМНЕ дополнително ја постави дилемата дали лидерот на СДСМ ги следи ставовите на Левица, од каде што претходно денеска, исто така, најавија дека ќе ги блокираат предложените измени на Изборниот законик.
„Последната поента што сакам да ја упатам како една остра критика до претседателот на СДСМ, кој многу често знае да ја истакне реторички важноста на граѓаните на Македонија без разлика каде живеат, дали во државата или во дијаспората, е што токму овој ИЗ предвидува електронско гласање на дијаспората, согласно моделите што ги видовме во Француската Република и во Република Естонија. Ваквото електронско гласање на дијаспората цениме дека е многу важно и за нивното учество со гласање на изборите за претседател на државата и за пратеници. Но предавничкиот однос на Венко Филипче, за жал, не се гледа само по неговиот однос кон граѓаните во Македонија, туку и преку неговиот пристап кон нашите државјани кои живеат надвор од границите на Македонија“,
рече пратеникот Милошоски на денешната прес-конференција во парламентот.
Милошоски оцени дека со ваквите потези СДСМ ќе ги загуби следните парламентарни избори, кога и да се случат.