При вршење на семејното насилство, осомничениот ја удирал сопругата со тупаници по телото и ја влечел за косата нанесувајќи ѝ телесни повреди
Основното јавно обвинителство Тетово поведе постапка и предложи притвор за жител на тетовското село Гајре поради сомнение дека при вршење семејно насилство ја загрозил сигурноста и им нанел телесни повреди на својата сопруга и на мајка си.
Според наводите на Обвинителството, осомничениот на 21 јуни, при вршење семејно насилство, сериозно им се заканил на својата мајка и сопругата. Најпрво им побарал 100 евра, па откако тие одбиле да му ги дадат, со намера да ги вознемири и заплаши, почнал да ја крши покуќнината и со нож им се заканил дека ќе ги убие.
„Сопругата ја удирал со тупаници по телото и ја влечел за косата нанесувајќи ѝ телесни повреди“,
велат од ОЈО Тетово.
Оттаму додаваат дека до судија на претходна постапка е доставен предлог за определување притвор за осомничениот.