Платниот промет, како што вели, е услуга што секојдневно ја користат граѓаните и компаниите, поради што прашањето за висината на надоместоците заслужува поширока јавна и институционална дебата
Според него, во голем број европски држави веќе постојат механизми за регулирање или ограничување на одредени надоместоци, а тие искуства можат да послужат како добра основа за јавна дебата и во земјава
Гувернерот на Народна банка, Трајко Славески, повика на разгледување на можни законски измени со кои на Народната банка би ѝ се овозможиле механизми за поголема заштита на корисниците на платежните услуги и за ограничување на одредени банкарски надоместоци, по примерот на повеќе европски земји.
Неговиот повик доаѓа откако четири банки во земјата во изминатите денови најавија зголемување на надоместоците за услугите во платниот промет, што предизвика реакции во јавноста и отвори прашања за потребата од дополнителна заштита на корисниците на овие услуги.
Во објава на социјалната мрежа Икс, Славески истакна дека платниот промет е услуга што секојдневно ја користат граѓаните и компаниите, поради што прашањето за висината на надоместоците заслужува поширока јавна и институционална дебата.
Тој нагласи дека Народната банка во моментов нема законска надлежност директно да ги регулира надоместоците што ги наплаќаат банките, но оцени дека актуелните случувања ја наметнуваат потребата од преиспитување на постојната законска рамка.
„Потребно е да се разгледаат можностите за дополнување на законската рамка по примерот на повеќе европски земји во кои постојат механизми за заштита на корисниците и обезбедување фер и предвидливи услови за користење на платежните услуги“,
вели Славески.
Според него, во голем број европски држави веќе постојат механизми за регулирање или ограничување на одредени надоместоци, а тие искуства можат да послужат како добра основа за јавна дебата и во земјава.
Посочува дека крајната цел е граѓаните и компаниите да имаат пристап до ефикасни платежни услуги по разумни надоместоци, во согласност со современите европски практики.